দ্বি'বে লিট্টিং কবিতে।(অণুকাব্য)
১/
----
উম্ কেইয়েত্ জুরোপানি ;
এ্যাগদ্ গুরি বাজে যুনি।
ন' ছুলোয়, ন' পোড়ায়! মাত্তর,
থাহর পেই বাজি আঘি,
সুঘে ওক্, দুঘে ওক্ মানে জিংহানি!
২/
---
হোচাপানা এজে থভাবুদি ;
যেক্কে পড়ে কানাকুদি!
চিমোর অয় বুক্! সেক্কে,
থাহর পেই হোচপানা মিঝে।
হি সুঘ্ হি দুঘ্....
বানাহ্ আভিলাস্ ভুদিভুদি!!!
--------------------------------------
৩১.০১.২০১৭ইং
মাধানর ছড়া.......
"মনআঝা"
-------------
কাম' নাঙেঁ ধাঙ্ ধাঙ্!
পুত্ লগর নেই নাঙ্।
কমলে গুরিবাক্ জুম্ ফাঙ্।
এক্কো এক্কো চেল্ চেল্।
ইজু বানাহ্ ধেল্ ধেল্।
মাঘ্ মাজ্ ফুরেই গেল্
জুম্ কাবা দেরী পলে,
নাট্ ভুই দাধ' অলে।
পুড়ি ন' যায় গমেদালে।
পূর্ব বৈজেখ্যে ধান্ হজা,
তিদি উদোন্ ধান্ গজা।
অক্ত মুজিম্ কাম্ ন' গল্লে,
হেনে পুরেবা মন্ আঝা?
-----------*--**-******-----
২৭.০১.২০১৭ইং
ছড়া
-----
লেঘা ন' পাল্লে মেল্যা কান্,
আন্ধার জিংহানি।
চিঝিরে শিঘেম্ লেঘা - পড়া,
ন' থোক্ ভাত্-পানি।
ভাত্ লাক্ পেলে জুরিবোং,
বেজোর রাদাঁবো নেজা।
নুও ছিলুম্, তুমবাচ্ তেল্,
কাবোচ্-কলম্ হঝা।
ইমিল্যে পেল' নুও বোই,
ইক্কুলোত্ যেব' হিঙিঁরি?
ঠেঙঁত্ ন' থেলে বোজ্জোদা,
আধত্ ন' থেলে বাঙুঁরী!
------------------------------
১৬.০১.২০১৭ইং
ছড়া
"নুওভাত্ হেবাত্তে"
---------------------
আগা পাদাত্ বিনি ভাত্,
একছিত্যা নুন্ গুলি।
তে..ল্, তে..ল্... ভাতজরা,
মামাহ্ দের মূলী।
এদক্কি আধা, বিনি ভাত্!
গালত্ বাঝন্ লেবেদে।
হিজেস্যা গুরি পানি খাদে,
বিষুম্ গেল' সেবেদে!
পোঅঃ, পোঅঃ। জুরোক্ জুরোক্।
হন্যাঁ নাঙ্ঁ ঘিনেত্তে?
তা'মামু এ্যাবলআই, নাঙ্ঁ ঘিনের,
নুওভাত্ থেবাত্তে।।।
-------------------------------------
২৫.০১.২০১৭ইং
ছড়া
ওলি গীত ( ঘুমপাড়ানি গান)
-------------------------------------
ওলি... ওলি... ওলি...ই....ই....
ইঁ....ইঁ...ঈঁ......
লোক্কি চিজি ঘুম যেব',
সনার দুলোনত্ পুড়ি।
ওলি.....ওলি.....ওলি...।
গলা-মরিজে আমনর,
হালিক্ দগা নেই।
দুলোন্ বুনিল' চলাআবে,
এগা'ড়ি ধান্ দিনেই।
সে দুলোনত ঘুম্ যেব',
সনার চিজি পুড়িনেই।
ওলি....ওলি....ওলি....
ঘুমান্ আনিল' পরী মিলেয়,
ঘুমর রেজ্যত্তুন্।
ছিদি দিলগি দুলোনানত্,
হাদি পেজত্তুন্।
ইঁ......ইঁ......
ওলি.......ওলি.....ওলি.......
লোক্কি চিজিক্ চুক্কি থাক্,
চোখকুন্ হাদিনে।
পরী মিলেয় তরে নিব',
পিদিত্ চড়েনে।
গোদা পিত্তিমীয়েন্ ভোঙেঁব',
মাধাত্ গুরিনে।
এ..ইঁ....ই...ঈঁ.....
ওলি.....ওলি....ওলি.......
উড়ি যেবে মেঘে মেঘে,
পেগ' সান্ গুরি।
বাচ্ছে আঘেগিবো দুয়ো মেলি,
চিবিত্ গাজছোত্ পুড়ি।
ঔ পরী মিলে.......!!!
বাচ্ছাক্..... বাচ্ছাক্......
লোক্কি চিজিক্কো ঘুম্ যেলোক্,
সনার দুলোনত্ পুড়ি।
ওলি...ওলি.....ওলি....
ইঁ....ইঁ.....ঈঁ...!..
রাজঘরত্ নেইবো সাম্মো হাজা,
বারেঙ্-ডিঙিঁরা সিঙবাগাত্।
চিজির চ'গোই আমততলে,
হদক্ সম্পত্তি এক্ জাগাত্।
ইঁ.....ইঁ.....ঈঁ.....
ওলি.....ওলি.....ওলি.......
ঘিলে আগন্। নাধেং আগন্।
আর' হি চেবাহ্?
গুলি হাজাত্ গুলি আগন্!
জাগাত্ জাগাত্ পেবা।
লোক্কি চিজিক্কো ঘুম যার।
হবদ্দার..........!!!!!
হিচ্ছু লাড়ি ন' দিবা!
এই....ইঁ....ইঁ.....ইঁ..!
ওলি....ওলি.....ওলি.....।।।
**********************
26.01.2017 ইং
