ছড়া,
ডিজিটাল বৈদ্যালি
---------------
উন্দুরবো গল্ল' মোবাইল,
বেলেইবো ধল্ল' ফোন্।
মুইদ' ইক্কে ঘরত্ নেই,
এ্যদো শিরে মোন্।
.
ম' বুড়ির উয়ে মাধা পিড়ে,
দিধে তেল্ পুড়ি।
আগা পাদাত্ জেততেল' নাদাত্,
ফোনান্ থাক্ ধুরি।
.
অসুগে অসুগে বাজার বন্,
নেই হোনো তেল্।
ডালি, বাহঝা দেধে দেধে,
গদা জিংহানিয়ান্ গেল্।
.
মাধা উজু ফোনান্ ধুরি থাক্,
মন্দর জুবি চাং।
গম্ ওই গেল্ মাধা পিড়ে,
তুই থাক্ মুই যাং।
-----------------------
১৮/০৭/২০১৬ ইং
তরে বলাঙঁর
----------
কনঅ বজর ন' অলেও বেড়েচ্ছি তুই এ বজর।
পধতান্ দেঘে দোঙ শুনি থাক্.....
যিয়ত্ ছড়ান্ উয়ে দ্বি দজর।
দজরর ডেন্ ধাগত্ চামিনী গাজ্,
গাজ' ধাগেদি জুমো পধ্।
ডেনে-বাঙেঁ ন' আহ্লে যুনি তুই এজস্,
হামাক্কায় লুমিবেগি চ্যা ম' ঘরত্।
.
ঘোত্যা-ঘোড়া পধঅ মায়।
বিজোল্ ফিজোল্ পধ্,
নক্ কুবি কুবি য়্যেস্ চ্যা হামাক্কায়।
মাঠ্যা জুক্, চিন্যাহ্ জুক্কুন্ ন' ডোরেস্!
ফোঃ ফোঃ ছেপ্ দিনেই....
মুগুজো পাদালোই তুই ফেলেস্।
.
এক্ কাবঅ মাধাত্ জিরেচ্ছি।
গুলো গুলোও... কাদামলাহ্!
ভারীও অজল্ নয় চ্যা, আধতলাহ্।
সিত্তুন্ গুলোদক্ হে বল্ ভোরেচ্ছি।
.
সিত্তুন্ উদিবেগি দ্বি কাবত্।
বুজিবেগি পধঅ পাজারা জুম্ চাবত্।
পিজেদি ফিরি রিনি চেস্,
দেগিবে, গাজঅ ঝুবো ছেরে ছেরে,
রিপরিপ গুরি দেঘা যায় চ্যা...
ফেলে ইচ্ছসচ্ছি ঘরানি আদামত্।
.
তিন্ কাবঅ মাধাত্ চিবিদ্ গাজ্।
ছিলুমো গুত্তুন্ হুলিনে হাক্কন্ থে চেচ্ছে,
কেজান্ পাহছ্?
জুরো জুরো পিবির পিবির বুইয়ারানি,
হুত্তুন্ এজেরও চ্যা কিজেনি!
.
জিরে ফুরেলে লর দিবে।
মোন্-মুড়ো চে চে কদঅ কধা ভাবীবে।
হক্কে হক্কে মোনো পিদিত্ লুমোচ্ছি,
হবরও চ্যা তুই ন' পেবে।
.
মোনো পিদিত্ যেক্কে উদিবে।
ডেনে-বাঙেঁ হুয়োও গুরি,
সেঙেঁ কাজলঙঅ হুয়োঙুন্ দেঘিবে।
যেক্কে তরে ধুব্ ধুব্ ঢেবা পানিয়ানিয়ে ডাগিব।
হবর পেবে, সেক্কে তর....
উদিবজোচ্যা বিদিযিয়া কধানি,
হোচপানার পুরোন্ মেইঁঞানি,
পিড়ে-ব্যেধি ধক্ জাগিব্!
তুজো আগুনো ধক্ আঙিঁব্!
.
সেদক্কানি কধা ন' ভাবী।
দোগিন্ মুখ্যা সিজে বেহ্ ;
লাঙেঁলঅ পধ্ ধুরিচ্ছি।
পত্থম্ লাগত্ পেবে যে ঘরান্,
আমিজে লামেয়্যা থায়চ্যা সাঙুঁয়ান্ ;
পিজুম্ বাজ্ ধুরি চুবেচাবে তুই উদিচ্ছি।
--------------------------------
১৬/০৭/২০১৬ ইংরিজি।
ইক্কো হোচপানার কবিতে ওক্......
"যুনি ফেলে ন' যাস্ পরানি"
------+----+---------
হবর ন' পাং পরান্,
হুদু তর ঘরান্,
হেনে আগচ্ হিজেনি এ মাধান্।
অজার পিত্থীমির মোন্-মুড়োর
হোনো এক্ জাগাত্ পুড়ি।
ঘুম্ নেই মর দ্বিবে চোখ্,
নীজি রেত্ জাগঙ্,
তুই আগচ্ ম' লগে....
স্ববনে পত্থমে দেঘঙ্।
আ হদ' হধা ভাবং...
অজার পিত্থীমি ফেলে,
হেনে রলে মর চিগোন্ মনান্ জুড়ি।
.
হোচ্ছেবারও ছের নেই,
জুড়ি আগচ্ পুড়িনেই।
হুদু থোম্ মর বারেং, ডিঙিঁরা,
লুদুঙ্, সাম্মো, জিংহানির সজপদর।
সিধেনদি টাঙ্যাঁ ফিয়াবো,
সিয়ত্ ঘুর হারি মরের
আওজোর দুলু বাজর বাজিঁবো।
সাজিত্ ভিজিযার ফুলবারেং,
নায়ানাক্যা মর এই গারেঙ্।
পরানি, গায় গায় তুই ন' আদর।
.
চেরোপালা ইক্কে ফুদোদন্ ফুল্,
নানান্ পেক্ এত্তন্,
গাজে গাজে বাহ্ গত্তন্।
দিন্নো এলে ন' ফুরোয় তারার নাগরানি।
সাজি উদের ইক্কে মনর জুম্,
সজে উদের খেত্ খেত্তি।
দোগিনোর শিজেবোত্ বানিম্মোই ঘর।
সুমুরিম্মোই জিংহানির সজপদর।
যুনি তুই ফেলে ন' যাস্ পরানি!!!
-------------------------
১৩/০৭/২০১৬
আরো ইক্কো বারিজে ছড়া,
"চেজেক্ বুবুক্"
-----------
চেজেক্ চেজেক্ ভাত্ পিলে,
তেদের তেদের দেবা ঝড়।
দ্বিবে গরুলোই ধেদেক্ ধেদেক্,
বামত্ বাঝে জুনোপহর্।
.
দারবো অয়ে লেদা লেদা,
পিবির পিবির বুইয়ারান্।
গরুউন্ ন' আধন্ সুজুর সুজুর,
ঘরত্ রুয়ে জুমোরান্।
.
ভাত্তুন্ অলাক্ পেচ্ছাল্ পেচ্ছাল্,
হুজুক্ হুজুক্ ঘোরবোউন্।
দুধ্ ন' হেলে ঘিলুকবলা,
হেনে অবাক্ পোড়বোউন্।
.
গরু ছ'বো ছিয়ান্ ছিয়ান্,
দুনুম্ দুনুম্ হন্যাঁ যার?
হিল্যে হিয়ো পিয়ক্ পিয়ক্,
দুধতান্ উদুরেবো পেলাংবার!
-----------------------
১২/০৭/২০১৬
ছড়া ( আঝার মাজর শেজত্)
আঝার মাজ্
----------
দুরোদুরি মামু ঘর,
চিজি যেব' বজর পর।
উজুমহনে আঝার মাজ্,
ঠেঙেঁ ন' ছুয়োয় মাদি বাজ্।
এক জাগা হুচ্ এক জাগাত্ যায়,
হাক্কে হন্যাঁ আজার হায়.....
যাদে যাদে বেল্ দিবোর,
এক্কো আজারে তিন্ চিদোর!!!
*************************
০৯/০৭/২০১৬
