"বিঝু সাম্বাদ্"
-----------------
ফুলুনে দেধন্ সাম্বাদ্,
বিঝু এ্যবার হাজেয়্যে।
ফুদদন্ গাজে গাজে,
ইলেপাদারে হুজিয়ে।
ফুদদন্ নানান্ ফুল্,
নাগর মাত্তন্ পেক্কুনে।
বিঝু এজের জুগোল্ অধন্,
গাজ্-বাজ্ বেক্কুনে।
বিঝু ফুল্লো তেনা দেল্লি,
মাদি ফাদিনে।
গেল্লে বজর লাগে থুয়োন্নি,
দ্বি আট্যে-নাদিনে।
ফিরিলো ফাগুনো আহবা,
মাত্তল্ বুইয়ারান্।
ঝিমিদত্ নিল' উড়েই,
দোগোনত্তুন্ হবঙাঁন্।
---------------------------*-*---
১০.০৩.২০১৭ইং
সময়ের ছড়া.....
"বিজবিজিদি"
------------------
জুম্ ফাং গোল্লুঙগোই দোগিন্ ধাক্যা,
বেক্কান্ রোদচলা।
নাক্কোনো বুগোছাজ্ হি গত্ত',
সেত্তমান্ ছাজদলা।
এ বজর যুনি ন' পারং বাহনে,
ঘুচ্যে, সুধো, ধান্।
পাত্তুঙ্ নয় সালে হন' বজর,
গদা জিংহানিআন্।
গরম্ গরম্ ছেইয়্য মাধাত্,
ছিদিলে গমদালে।
হেনে ন' পারে বেগুন্-মুরিচ
বাহনে, চাং সালে।
পত্তি বজর বিজবিজিদি,
আধিক্ যত্তনে।
হুবোত্ থবে হবর ন' পাহচ্,
ন' হুলোয় ঘরানে।
অক্ত এলে নেগেলে দ্যোচ্,
উদি বোজোস্যা বিজি।
হেবার ছহলাত্ আহবিলাস্ হাস্,
হবাল্ মাধিত্ ঘুজি।
মুরিচ্ বিজি থবে, হাদি পেজত্,
বেগুন্ বিজি হবঙত্।
আর' থোচ্ছোই চ্যে ভুদিবানি,
চুমোপাব আ লুদুঙত্।
-----+-+-----_-----++----------
১৩.০২.২০১৭ইং
"ও সু'নানু"
-----------
ও সু'নানু,
হমলে ফুদিবাক্ তর দ্বি'বে চোঘ্,
দিন্, মাজ্, বজর, যুগ যার বিদি।
সহরল ওই আগচ, মাতবুল্ নেই!
হমলে এবে উধি???
বানাহ্ ঘুম্ যহর বেসত্ গুরি।
ইন্দি হিলহিলাদন্ হালাদেন্!
পিজে-মুজুঙেঁ, হোনাহুনি, ঘোনাঘুনি,
মানেয়র রুক ধুরি!!!
জেট্টা-জেদেঙাঁ, আট্ট্যা-বড়ঙাঁ,
মল্যা-মোলেন্, হুত্তো-হুরোঙাঁ।
তর চোদ্দোগুত্তি সিধেসিধি।
ন' থরন্ পাগত্, চাহগি না ধাগত্,
আমিজে মরনান্ চুমে দ্যং দ্যং নাগত্!
যেবার দ' হোরেলং বুরুজ্ উধি!
""আগর স্ববন্ নেইয়ার বুগোত্।
ন' ভাজে সুঘ্ দ্বি চোগোত্।
হুত্তুনো ভাজিবো???
যুনি ছ'বাই মুয়োত্ এ ন' পাল্লে আঝিবো"!!!
----------------------------------------------
02.03.2017
"চিত্ পুড়িবার হিচ্ছু নেই"
-------------------------------
হোবাল্ ন' পুড়োক্ ; তর হোচপানা!
ফেলেনেই বড় বড় এ্যরাহ্ দমা!
মাধা উজু সিলিং ফ্যান্,
এ্যয়ার কন্ডিশন রুম।
হরানত্ ঠাণ্ডা, জারাল্যা উম্ উম্!
ইদু এলে তর এক্ লেজা ন' অব' ঘুম্।
ও ভেই, ন' মুরিচ্ছি স্বর্গপুরী ছাড়িনেই!
হোচ্ পেবারও হি আঘে,
রেনি চেলে দেঘে।
উজু উজু মানেয়রে,
চিত্ পুড়িবার হিচ্ছু নেই!!!
মোনোমুঞ্জি ভাঙাঁ ঘর।
সুঘো দেঘা নেই জনমভর।
জিংহানিত্ ন' হান্ তারা আভিলেস্।
গালি ন' জানন্ লুচ্ছো।
যা ধগে তে, যা জাগাত্ তে,
আগন্ তারা পুড়িনেই!
হি অব' চিতপুড়ি।
থাক্ চুবেচাবে জুচগুরি।
হি দরকার?
উজু উজু মানেয়রে,
চিত্ পুড়িবার হিচ্ছু নেই!!!
যেই যেই হুইয়োন্ সংসারত্।
ভুঙীঁ পুজ্জোনদি আন্ধারত্।
অহদত্ বেক্কানি ইচ্ছন্ ফেলেই।
বিদ্যে-বুদ্ধি, লেঘা-পড়া।
পাগ্-চক্কর, ঘঙঁদা-হঙঁদা।
ইচ্ছনদে চুধো আধি,
বানাহ্ গোজেনর নাঙাঁন্ লোনেই।
ম'লে মত্তোক্ বাজিলে বাজতোক্।
হি অয়ে ; তর হোবাল্ ন' পুড়োক্!
চোখ্ হাদি থাক্.......
চিত্ পুড়িবার হিচ্ছু নেই।
ঘুচ্যে-সুধো যা কামাদন্।
অজেঅজ্ তার দাম্ ন' পাধন্।
মোন্-মুড়ো ভাঙীঁ,
দুঘে বুগি আনি
বেজিবার মাধানত্ থগা হাদন্।
সিয়ে-চেরআনা যা পাধন্,
তেল্-নুন্ কিনি, গঙাঁদন্ জিংহানি
দ্বি আধ্ সিধেন্ দি নিঃচিদে গুরিনেই।
হি অব' তারারে হোচপেইনে।
তর দোল্ ঘর গিরিত্তি থোইনে।
উজু উজু মানেয়রে,
চিত্ পুড়িবার হিচ্ছু নেই!!!
তুই বাজিনে যুনি জাত্ বাজে।
ন' থাদোক্ না জ্ঞেদি-গুত্তি আদে হাঝে।
তুই বাজিলে অয়।
হি দরকার তারার বাজিবার?
উদোদোক্ বুরুজ্। লুগোদোক্ চারঘার!
নেইদি আর কারবার।
গরজ্ ন' পড়োক্ মানবতা দেঘেনেই।
দরকার নেই, দরকার নেই।
সুঘোর গিরিত্তি ছারিনেই।
উজু উজু মানেয়রে,
চিত্ পুড়িবার হিচ্ছু নেই!!!
--------------------------------------
09.03.2017
সময়ের ছড়া.....
"বিঝু বেড়ান্"
--_-------------
এচ্যে ভুজি ভজান্ হুজি,
বিঝু বেড়ান্ হাজেয়্যে।
বিনি পিধেয়, সান্নে পিধেয়,
জুর জুর গুরি সাজেয়্যে।
বিঝু বেড়ানত্ পিধে মজা,
দিবাক্কোই ভাগগুরি।
তুলী থুয়েগোই উত্তোমাজাত্,
পোগোন্ পিলে আকগুরি।
দাধাহ্ নিদ' চায় বায়াঁল' পিধে,
ভুজি হ'দি থোকনাহ্।
দাধাহ্ হ'দি হদক্ যেবাক্???
আঝার টেঙাঁ যোকনাহ্!!!
বায়াঁল' পিধে, বায়াঁল' ফেজন্,
পুদি পুদি সপ্পানি।
আজু হ'দি, সেনে যাল্লোইও উধি,
দয়্যাঁ, মেইয়্যাঁ...বেক্কানি!!!
------------------------------_----_----
26.02.2017
