এ মাধানর ছড়া,
"মাজ' জু"
--------------
টেগাটেক্যা ভুঁইঅ পদ,
দুরোত মামু ঘর।
সিত্তুন আর' বিজোল ফিজোল,
দেবাবো ধুজ্যে দর।
এদে - আগারে গল্ল' বান,
ভুঁইঅত অল' পানি।
মামু কাবিল' ঘঞ্যাঁ মাছ্,
একশত গুনি গুনি।
বদাবলা ঘঞ্যাঁ মাছ্,
হেইন' ফুরদন হেই।
আমি যের মামালোই,
পহঁত্যা উদিনেই।
-----------------------------
০২.০৬.২০১৭
বুব স্বমন!
------------
মর স্বমনানি বিজেরাং গভীন রেদোর আন্ধারত।
মন গাঙঁর হুম্বুগত,
ঘুমলেজা ত'গুরি ভাবনাত লামং।
আজু - পিজু আমলর,
সুদিন মাধানর রাঞ্যাঁ, মোন, মুড়ো,
বাজপাদা ছেঁইয়া ঘরানি....
যিদু বাঝী আঘে এব'
পিজুম বাজে বাজে,
আলুলো দুলুলো মেইঁয়ানি।
আ লেবেদে আঘে আদুলি আদুলি হোচপানা,
জুম ঘরর থবাগত।
বিজেরাং স্বমনানি মুই মুড়োছেরে নুন্যেশিলো কুওগাঙঁত।
স্বমনানি বিজেরাং মরা মরা ছিনেপাদা বিজগত।
মাজারা আধাং হুড়ি আধেই,
পল্লাপল্লি পিত্থিমীত।
হুদু আঘে আওজর চম্পক নগর।
যিদু এল' তর - মর,
জ্ঞেদি - গুত্তি বেক্কুনর,
স্বাধীন স্বর্গরেজ্য। বিজেরাং আমিজে,
সুঘর স্বমনানি তুজিমপুরো, যিদু এল' দ্বি চোঘত।
মর স্বমনানি বিজেরাং হোজচে গাবুরির দ্বি চোঘত।
ইক্কে দ' তে চিগোন নয়।
নিজ' মন ধগে কধা কয়।
স্বমনে স্বমনে এ মাধান,
থক চাং তা মনান,
উদ' পাং পাং, আ ন' পাং।
ভাবনাত লামং,
অঘুর দজ্যার গঙাঁর নালত।
বিজেরই চাং গাবুরি ইরুক কি জবের তা মনানত।
স্বমনানি বিজেরাং ঘুমানি ত' গুরি দ্বি চোঘোত।
দিন যায় রেত এজে,
স্বমনানি চোঘত ভাজে।
ভাজি যায় ছড়া নালে,
ঝড়ামাল ওই অনালে।
তুও স্বমন দেঘদে দ' মানা নেই।
সেনেত্যে দ', তরে দেঘং স্বমনে...
"দিঘোলী বাগত চত্তন মোষ"
সমারে বেড়র চে ননন - ভোজ "।
ভাবর অলে ম' কধা,
গপ মারর নানাগান নিবিরোত।
বুব'র স্বমন হালিক, মাত নেই মর এ মুয়োত!!!
------------------------------------------------------------
০১.০৬.২০১৭
মাধানর ছড়া,
"বেলেই ন' থেলে"
----------------------
মা - বাপ যিয়ন দুখকামত,
চিঝি দাগী ঘরচুগি।
মিললন গুরোঝাক ঘরানত,
দেবাবো গল্ল' ঝড়মুগী।
মিগুলো দেবাত গুরোর বল,
যুনি দে আর' ঝড়।
লদক ধদক এ ঘর ভাঙগে,
হক্কন লাগে তর।
বেলেই ন' থেলে উন্দুরো বল,
তান ন' মানে বেড়।
ঈদোত উধে চিগোন কালুন,
এক্কা পেলে ছের।
---------------------------------
২৯.০৫.২০১৭
সময়ের ছড়া
"নানুমরা"
----------
কধা ক'লে দোলে কোচ্!
মূ বাঝি চলিবে।
সত্য কধা দুরোত থঅ,
ফরফরেলে মুরিবে।
ডেনে - বাঙেঁ চেই চেই,
হুচ দিবে ভ'গুরি।
ন' মুরিচ! কবার থেলেও
এক্কা থগোই ত'গুরি।
দুগ আঘে সুখ নেই,
বানাহ্ গঙেঁর দিন্ন'।
ইক্কো শিলোত ইক্কো কাঙাঁরা,
হাচ্যত ওল জুম্ম'।
রাজা থেনেই রাজা নেই,
তা কধায় চলদং।
নানু অলাক ঝাক্কুয়া,
মাছ দলে পা দলদন!
আধিক নানুয়ে নানু নেই,
নানু মরা জুম্ম।
মারামারি, কাবাকাবিত্
আমি অলং লুম্ম।
---------------------------------
২৮.০৫.২০১৭
আয় তুঙ্গোবী
-----------------
আয় তুঙ্গোবী আমাইদু,
দলা খারা ওই।
মাট্যা ঘরত চানা জগা,
মেত্তল মেত্তল বোই।
মামায়ো নেই বাবায়ো নেই,
যিয়ন দুখকামত।
ঘর চুগিবো থে পাং মুই,
বেল্যা মাধানত্।
আমা ঘরান ভাঙাঁচাঙাঁ,
কম্বা কম্বা ছের।
কুগুরে খেলেগোই মিজেলানি,
মাহত্তুন খেপেম মের।
চিক্কো পুদিরে লুক্কি পুদিরে,
বেক্কুন ডাগি আন।
সাত ভেইয়্যা, একবোন সাজিবং,
দুলোহুমোরী সান।
রুয়ো বাজত দুলোন টাঙেঁ,
দুলিবং দুলোনত।
মৌঁইয়্যা হুদোত, কাট্টোল খারা,
খেলিবং উদোনত।
তুই য়েস লূঃদি ধুরি,
ঝনাত ঝনাত গুরি।
আমি থেবং মৌঁইয়্যা হুদোত,
ভাতজরা বানদি ধুরি।
পাগানা কাট্টোল পাড়িস তুই,
রাজার উগুমে।
আমি থেবং কাট্টোল ওইনে,
কমরত ধুরিনে।
নুও বো, নুও জামে সাজিবং,
বিগিদি বিগিদি।
তুই ওচ মর রাধামন,
মুই ওম তর ধনপুদি।
_------------------------------
১৯.০৫.২০১৭
