এক্ টেপ্ এক্ টেপ্ গুরি তেবে তেবে,
তল্লেই ভিলি তেবেলুঙ্ বেবে।
মর্ নেইয়া, নোনিয়া হোচপানা;
সাতরঙ্ স্ববন্! আ---
হিরিমিরি নাগর্ লুচ্চোমি।
আক্ গুরি থোইয়ঙ্ ভুদিবানি।
ইচ্চা তরে আওজ্ গুরি,
ত' বুগিত্ চাবি চাবি--
উভোদ্ গুরি দিলুঙ্ মাবি।
সে তর্ ভালক্ বজর্ আগে,
রাঙাঁবী দাগি ঘরত্ তুই-মুই ---
বিজু খেবার লক্কে।
তর্-মর্ দ্বি জনর্ ---
সুঘো-দুগো হধা সয় সাগর্;
হুলি হুয়েই দিনভর্।
এনে তর্ মনত্ আগেনী?
ফেলে ফেলে চোগত্ ভাজেনী?
হদক্ উল্ পুরি যিয়োন্ শান্নি পিদে;
এ জাগাত্তুন্ ও জাগাত্ থদে থদে।
বাচ্চেয়ছ্ দিনে-রেদে।
লোলোক্যা পরানে;
বুজ্ ন' মানে।
ন' বুজিলে পরান্;
বুজানাও হেনে।
অদ্ মদ্ ফুরে, হোনোদিন্ এলে;
নাগর্ নাগর্ আঝিঁ দিনে হধে।
রাঙাঁ দা, এদক্ দিন্ হুদু হুদু রলে?
এনে তর্ এব' মনত্ আগেনী?
সে সুঘোর্ দিনুন্, এব' তর্ ---
চোগোত্ ভাজেনী?
মনত্ তুলি চেস্,
ঘুর্ বারিজা লামিলে,
দেবায় দর্ ধুরিলে,
মুগুলী জেদেনা ফুদেনেই,
খাং ন' খাং গুরি চাবেনেই,
চানাহ্ ভুরোত্ বুজিনেই,
আহধ' হুলুঙোত্ সাজি পানিলোই,
খারা অই অই ----
হিজেনী হুন্দি যেন্ রিনি চেই,
ধাগাধাক্যা বুজিনেই,
ন' ফুরেইয়া ভাচ্ মাদিনেই,
হদক্ সুঘোর্ দিন্ গুঙিয়েই।
একবার্ বো, পিঙ্গমা ছড়াত্;
হাঙাঁড়া ধুরিবার্ ছলাত্।
আগুন্ লুরো মুরিনেই,
পথ্-ঘাট্ আহরেনেই,
আহধে আহধ্ ধুরিনেই,
শিল্ চাদারা বে লামিনে,
ফিরি এলংগোই জুন্ পহরত্।
তুই গেলেগোই ত' ঘরত্।
মুই গেলুঙগোই ম' ঘরত্।
এই হধানী হি নেই --
তর্ মনত্?
এক্কান্ ছড়াও বাদ্ নেই,
মাজ্-হাঙাঁরা তোগে ন' হেই।
হদক্ সুঘোর্ দিন্ গুঙিয়েই।
হাদিমাস্যা জুন্ পহরত্;
তুই-মুই ইজোরত্,
পিবির পিবির বুইয়ারত্;
শিঙাঁ বে বে ---
উভোগীত্ গে গে ---
রঙে ধঙে হাদেয়েই।
গঙেবার্ দিনুন্ গুঙিয়েই।
মরে তুই এনে, হবেনী?
সে সুঘোর্ দিনুন্ তর্ এব',
চোগোত্ ভাজেনী?
লাঙেল' দাপ্ পাদেরী পহধদী আহধিদে।
শুনঙ্ ন' শুনঙ্ গুরি,
হুই হারিনে মরে ডাগিদে।
নয় ভাদিগাছ্ নয় বড়াগুলো গাজত্ তলে।
গাজ' শিঙোরোত্ বোই বোই,
চুচ্যাঙ্ তাগল্লোই খারা অই অই,
বাচ্ছেদে। বাচ্ছেবার্ অলে।
জুমো ধানর্ পাদা এলুনী হেলুনী;
নাজিযায় বুইয়ারত্।
তর্-মর্ নাগরর্ ভাচছানি;
বাঁঝি র', হেংগ্রঙঅ র', আ---
চলাচলি হিরিমিরি লুচ্চোমি।
গুঙিঁ যিয়ে জুম্ পাড়ত্;
ভাজী উধে মর্ মনত্।
রেদোত্ জাগঙ্ স্ববনত্।
মর্ দ' এজ' মনত্ আগে,
তুই জুমোত্তুন্ এবার্ ছলাত্।
ছেহবো; তর্ পুল্যাঙ' তলাত্;
রিনি চেলে ঘোর্ ঘোর্। (ভারী)
আঝি আঝি পুজোর্ লুয়োঙ্,
জুম্মবী হি আনর্?
হধা থোক্ ন' থোক্;
মাদা মাদি আহঝা আঝি ।
সে দিনুন্ হি যিয়োননোই আজি? (হারিয়ে)
ভেরাক্ ভেরাক্ চোগোত্ ভাজে,
চেলে দেগিম্ পারা আহদে হাজে।
সে সুঘো দিনুন্ তর্-মর্।
বানাহ দ্বিজনর্, বানাহ দ্বিজনর্।।।
কোন মন্তব্য নেই:
একটি মন্তব্য পোস্ট করুন