হিলোভিদিরে

দাঙ্দাঙ্যা চিদতান্ জুরেম্ ভিলি,
তিরোচ্যা মনত্ পাল্ তুলি………..

বেড়েলুঙ্ দেজ্-বিদেজ্,
পধে-ঘাদে, শহরে-বন্দরে।
ন’ পারিলুঙ্ চিদ্ জুরে;
এ মন’ আওচ্ পুরে……….
ম’ মনান্ আমিজে পুরি থায়,
য়েল্ মোনো হিলোভিদিরে।

কারে পেধ’ চায়?
কারে দেধ’ চায়?
ম’ মনান্ মুই ন’ পাঙ্ ধুরি।
শেঝমেঝ্ মনান্ থীর গুরি,
অধ’ জাগাত্ এলুঙ্ ফিরি।
ঈধোত্ তুলি পারঙ্ নাহি,
আরেযিয়া দিন্মাধান্।

দীগোল্ ভালক্ বজর পরে;
বুড়োরান্যাঁ ঘুরি চানা।
মোনো আদামত্ হিলোভিদিরে।
এবল্ মর মন্ তুবোলর………
কি উধের কি পরের!
মন্ বারেঙর উলপুজ্যা…………
মকতবা পঝানী লারি চাঙর।
কন্ পঝাহ্ কুনদি পরে!
এগদে ঈধোত্ উধিল’ তরে!

>>> ধেক্দীঘোল্ মুড়োমুড়ি!
থেক্ খে খে জিরে জিরে উধি উধি।
বুগোত্ বানি রাঙাঁ স্ববন্ ভুদি ভুদি।
গঙেঁবার গুঙিয়েই,
আঝিরঙেঁ কাদেয়েই।
চোগোত্ ভাজেনী এব’ তর?
সাঙেত্ সমান্ মর জনমভর।
সুগো-দুগো কধানি জুম্মবী,
কাদেয়েই তোমালোই আমি।

ধুজিয়ে ধুজিয়ে ধুজোধুচ্যা এল’ জুমানী,
এ গর্ আমার, ও গর্ তমার।
দ্বি গর’ ছেড়ে তাগলক্ পাদি………
এক্ ঘাধ’ পানি খেয়েয়োই,
জুম্মবী, তোমালোই আমি।

পুষমাস্ এলে…….
মিধা মিধা রোদোত্ পিঠদি,
তর কবাকালা চুলানি ইতদি।
দগিন্ ধাক্যা ইজোরত্,
দোরোকুরে পিজোরত্।
নিগুজ্ নিগুজ্ ভাবনার সেই……..
রাঙাঁ স্ববনানি এব’ দেগচনি?
পিত্থীমির বেক্ জঞ্জাল্ ভাবনা!
এবার এজোক্ এজে……….
সে দিনুন্ এজ’ মর চোগোত্ ভাজে।

জুমো ধানানি রঙ্ ধুরিলে,
হায়হুরে তদেক্ উড়িলে।
গাজে গাজে বেলালায়া, উগুরিক্,
বাল্যাপেক্ পুরিলে………..
সুরতুলি ধুধুক্ বেহ্ বেহ্……..
কুই কারিনে বাদল্ মারিদে,
লামা গীত্ গেহ্ গেহ্।

কাদিমাস্ গেলে,
ধান্-সুধো ফুরেলে,
পিয়োক্ পিয়োক্ জুরো পরিদো জুমানী!
নিবিলি অধ’ পধ্-ঘাট্।
কুজিরাঞ্যাঁত্তুন্ অই যেব’ বুড়োভুইঁ।
কজমা কজমা অই উধিবো,
আমা রাঙাঁ মনানি।
ঈদোত্ আগেনি এব’ তর?
সাঙেত্ সমার মর জনমভর।
সুগো-দুগো কধানি জুম্মবী;
কাদেয়েই তোমালই আমি।

বিঝুদিন্ এলে, জায়জুগোলে,
মিধে জঙঁরার আকরুজি!
সিংগোবা দোরোত্তুন্ আঝি আঝি!
পার্বূয়া ধক্ পুঝি পুঝি,
মরে বলেদে……. ।
এধক্ বজর পরে!
মাজারা ন’ পেলুঙ্ কায়কুরে,
সে আরেযিয়া দিনুন্!
বানাহ্ আগাজত্ বুইয়ারে উড়েয়ে,
সেমেততুলো ধকগুরি,
বুইয়ারে যিন্দি নেজায় সিন্দি…..
এ মনানত্ ভাজেদে!!!