বিঝু তুই এবে ভিলিনে

গাজে গাজে নানান্ ফুল্;
নানান্ পেগোগীত্।
দগিনো আহবা ছড়ান্ পিয়ে;

দেবাকালা, ইত্তুক্ ইত্তুক্ ঝড়;
ঝিমিলানিয়ো থায়, জিরেননিয়া!!
অ’লেনব’ কুয়া পড়ে।
ঝড় ঠিগেলে জার গরে।
গাবুর লগর গুদুখারা;
গাবুরী দাগীর ফুলছড়া।
চিগোন্ চিজি আমিজে নাঙ্ ঘিনে;
বিঝু তুই এবে ভিলিনে।।।

নুয়ো নুয়ো ছিলুম্;
পিজিছড়া, কানবাঝা।
কুধু কুধু বেড়েবার;
সয়সাগর মন্ আঝা!
আনিবে বিনিভাত্ ঘাত্যে;
এবে পিধে মজালোই।
গাবুরে ফুদেবাক্ রোনবাজি, হাবোই!
ইন্দি উন্দি হোই হোই!!!
মিধে জঙঁরার হুম্ মাধাত্ গুরি;
তুই এবে উড়ি উড়ি।
সেনে চিজি নাঙ্ ঘিনে;
বিঝু তুই এবে ভিলিনে।।।

জিদেজিত্যা কোগিল’ র’;
উন্দি, চত্তিদগানত্ গ’ গ’,
তুঙলোপুদি দাগী।
মামা রানের জঙঁরা;
ভুজি যিয়ে চোলকারা,
পহঁত্যা ঘুমত্তুন্ জাগি।
চিজি মনান্ হুজি হুজি;
জুর বাঙুরী পেইনে।
আমিজে তরে নাঙ্ ঘিনে;
বিঝু তুই এবে ভিলিনে।।।

করদ্ উত্তে লেলমপাদা;
লজা লজা পারাঙাঁ আগা।
চিগোন্ ছড়ান্ উয়ে…
ছাগা উরে ছাগা।
ন’ মিলন্ মাছ্-হাঙাঁড়া।
বেবে যিয়ে তোন্ তোগা।
লগে যিয়ন্ সংসমাজ্যা,
তোগেবাক্ কাত্তোলডিঙিঁ;
সেঙেঁতারা ছড়াপাড়ত্।
কুইয়াঙঁ আলু, তাত্ আলু;
দুরোর নিবিলি ঝাড়ত্।
বাজেবাক্ জিদেজিত্যা;
কা পাজন্ অয়….
কয় পদ্ দিনে।
এ জায়জুগোল্…..
বিঝু তুই এবে ভিলিনে।।।

নুয়ো সাঙুঁ বানেল’ বাবা;
ইজোরান্ টুনের দাধা।
পোল্ দের কেদাকতুক্;
রিনি চাহর ফিরি ফিরি।
জগা চাহর ঊরী ঊরী;
ফুল্যাঙ্-হাদ্দোঙ্ উজুকচুক্।
চোলুন্ ওয়ালে পত্তন্দোই কিজেনী;
লুজ্জে নাহি, ডিঙিঁহিলা ঘাজুনি।
নুয়ো বার্বারী বদলি;
লিবি পুঝি রাগিয়ো।
কিল্লে-পরজু বিঝু এলে;
আজের থেধ’ নয় ডিঙিঁবো।।
এ জায়জুগোল্ সেনে;
আ নাগুরী তেউচ্যে নাঙ্ ঘিনে;
বিঝু তুই এবে ভিলিনে।।।

বাবা ন’ পারের আগ’ ধক্ চুলি;
নিরিতিত্যে জীংকানি,
অভাবপান্ লগে সঙ্গি।
বিঝু বাজার ধুরিব’ ভিলি;
নীঝি থয় পা রাগেয়ে….
ঘুচ্যা-সুধো এক্ মণ তুলি।
ভালক্ দিন্ ধুরি আগে;
ওজোলেঙর পধ’ ধাগে,
কক্রেবুয়াত্ গুরিনে।
বেগর আওজর ইক্কোদিন্;
বিঝু তুই এবে ভিলিনে।।।