বিঝুর আগাম প্রস্তুতি স্বরূপ চাকমাদের জনপ্রিয়, ঐতিহ্যবাহী "ঠেঙাঁভাঙাঁ গীত" Ananta Ranjan Chakma স্যার'র হোজুলিয়ে।
( ১.- মরদ্ ২.-মিলে, ১+২- এগত্তরে)
১. ও...ও হালাবে!
---- হালাবে এ.....!!!!
২. ??????? (চুপ)
১. বিঝু দিনোত্ পহঁত্যা উদি,
গাদি বুর পাড়ি।
তল্লোই যেবং সমাজ্যে বোলা,
আগমুলিম্ গুরি।
২. ন' যেম্ দাধো, হাম্ আঘে মর,
বিঞ্যেঁত্তুন্ ধুরি।
পুদি পুদি বেক্ হামানী,
রয়েগোই পুড়ি।
১. ত' হধানি হি গোর গোর পাঙঁর,
হি অল' হবেনি।
হেঞ্জাঁন্ হেঞ্জাঁন্ লাগের পরান্,
ন' পাঙঁর পুরোনি।
২. রাঙাঁবীলোই যেচ না দাধো,
মরে ন' মাধেস্,
আমনে অল' হালা মিলে,
এক্কা ন' আহদেস্।
১. তত্তুন্ যুনি চিত্ পুড়িদো,
এদে জুচ্ গুরি।
মাধং ন' মাধং হি উয়ে পরান্,
থাচ্ছি ধুচ্ ধুরি।
২. আঝা এল' দা, ত' হোন্ডানত্,
বানাহ্ মুই চুরিম্।
যেক্কে চেদুঙ্ সাত্ রাঙাঁবীরে,
মরে হ' (দা) হি গুরিম্।
১. একবার গুরি দেখকোচ্ ন' দেঘচ্,
হলেজত্ নেজাদে।
জাগানেই পরান্, চিগোন্ বুক্কোত্,
বানাহ্ তুই বাদে।
২. কল্ দিলেদ' ত' লম্বরবো, (দাধো)
বানাহ্ Busy থায়,
এক্কা অলে হলেজ' মুখ্যা,
তরেদ' লাক্ ন' পায়।
১. রিচাজ' দোগান্ দ্যুঙগোই পরান্,
টেঙাঁ হামাঙ্গোই।
আঝা আঘে বিঝু ফিরি,
তরে তুলিম্মোই।
২. সত্য হধা হবেনি দাধো,
বুগত্ আধ্ দিনেই।
দিন্ দিন্ মরে ভুলি যর তুই,
Facebook হুলিনেই।
১. Facebook আঘে, Facebook আহলে,
চিদে ন' গুরিস্।
সংসমাজ্যে ভায়োন্নি হধা,
ছ'বাই ন' ধুরিস্।
২. লেঘা ন' পারং, পড়া ন' পারং,
পারিবে ভুলেলে।
শুঞ্যং দাধো বরবাদ্ যান্,
Facebook হুলিলে।
১. আজল্ হধা হুইয়োচ্ পরান্,
এনেও বুজঙঁর।
Facebook লাড়িয়ে মিলে ন' লোম্,
এগেম্ গরঙঁর।
১. গদা দিন্নো সময় হাদান্
Chating গুরিনে,
জাদ্ ফেলেনেই বেজাদ্ লদন্,
পাগত্ পুড়িনে।
১+২. মন' হধা থিদো গুরি,
ছড়াত্ লামিনে।
বিঝু দিনোত্ শমক্ হেবং,
আধে আধ্ ধুরিনে।
১+২. জনম্ জনম্ পিত্থী পিত্থী,
থেদং এগত্তর।
আমা মাধাত্ সেপ্ পোড়োক্,
স্বয়ং গোজেনর।
---------------------------
25.12.2016
কোন মন্তব্য নেই:
একটি মন্তব্য পোস্ট করুন