সনার চিজি ইক্কুলোত্ যার...

ছড়া

সনার চিজি ইক্কুলোত্ যার
---------------------

চুলোন্ কাবি জুরগি সাজ্,
      আর' গুলি তেল্।
দচ্ বাবুয়ে এক্ বাবু,
      চিজি ইক্কুলোত্ গেল্।
.
ঠেঙত্ পিনি বোজ্জদা,
     আধত্ পিনি ঘুরি।
টনঙ্ টনঙ্ ইক্কুলোর যার,
     মাদিত্ ন' বাজতন্ মুড়ি।
----------------------
৩০/০৭/২০১৬ইং

লাঙ্যাঁ পোড়া মুই এ যুগের আদিচরণ

"লাঙ্যাঁপোড়া মুই এ যুগর আদিচরণ"
(এ যুগের ব্যর্থ প্রেমিক আদিচরণ আমি)
-------------------------------

দাবাহ্ টেঙাঁ ছ'হুড়ি,
মদ্ দ্বি হুম্ দক্ গুরি!
শুগোর ইক্কো ছ'মুত্যা।
রুবোরাদি, উড়োন্-পিনোন্, জরা আন্দিক্,
বেক্কানিত্ দজত্তুন্ লোনেই সেপবট্টা।
ঢুলে-ডগরে আনিলুঙ্ আওজে বো "ধনপুদি"।
মনে মনে আঝঙর,
হদক্ হধা ভাবঙর।
মর আন্ধার গুধিবো,
এবারত্ যুনি ন' উদে সালে,
হন'দিন্ আর ন' উদিবো পহর ফুদি!
.
হুজিয়ে ঊব্ নেই ঘুরঙর,
রয়-ছয় গুঙঁগুঙাঁর মেলাঘর!
রেত্ সংবাক্, ঘুম্ নেই দ্বি চোঘোত্।
পাদাত্তারা আন্দলে,
চোঘো বিষচান্ মারদে..
সেরাং - মেরাং ওই বেল' পহর!
থাহর ন' পাং ইন্দি মর,
হক্কে হক্কে লুরি যার পরান্ ঘর!
.
মেলা ঘরত্ বুদিলাক্ জোল্।
ঠিক্ নেই, হন্যাঁ হন্যাঁ বাঝার হোল্!
ম' পুনোত্ চাবরে চাবরে,
জাগাল্লি চোঘ্ পিজিনে ম' মামাহ্।
নেইদি বো, নেইদি...... তম্মা!
নাঙ্ সেদাম্ লুগেয়্যা মরার পুও,
ভালেদও অদে নয় জনম্মো!
নুও বো হুদু যার তর উদিজ্ নেই?
এগাজাত্যা পাল্লো শুগোরো ধক্ গুরি আগজ্,
পাদাত্তারা আন্দলে পুড়িনে!
চুগুলোঙোঁ হুম্ হরত্ লোই,
তম্মাবো বো তম্মা,  জয় মঙ্গল' ঘরত্,
রাধামনত্তে বো উত্তেগোই!
.
উন্দি জয় মঙ্গলে ডাগি হহর,
হারঅ হধা শুন্দুং নয়.....
স্বাক্ষী গুরি গঙ্গী মা,
ঘরত্ উত্তেগি লক্ষী মা!
পরান্ দিলে মুই দিম্!
লামে ন' দিম্ হনঅ দিন্!
ম' নাঙ্ অয়ে জয় মঙ্গল...
ভরন্ পানিহুম্ লামে দেনাহ্ হু মঙ্গল!
.
মেলা ঘরর ওজোলেঙ্,
মদে-জঙরায় ভাজী যার!
জামুরা সাব' বিজঅ ধক্,
এ্যগদ্ এ্যগদ্ মর মনর দুক্কানি উজান্ বাহর!
দুচ্ নেইয়া মদ' হুমুন্ লাথ্যাঙর!
পাগল্ হুগুরো ধক্ ভঙঁঙঁর!
হারে হি হঙঁর, দুচ্ হার,
সে উদিচ্ ন' পাঙর!
.
দোদে রাজা উদিবের হোরিয়্যং।
ধগে পাজনে মর আক্কল' গুদিয়ে,
সমাজ্যাউনো যা আরেবার আরেয়্যং!
পরানে মাঘে রাজ কন্যেঁ ধনপুদি।
কয়জনে ফেস্ গত্তন্ এ্যবল্ ম' গুদি!
কান্ ওক্কোর্ ন' পারং!
ইজেপ্ নিয়েজ্ ন' পারঙ্।
হুত্তুন্ বুজিম্ মুই য়্যেন্-কারন্।
অ'ভালেত্যা, অ'হবাল্যা, সেদাম্ পাঞ্জ্যা,
লাঙ্যাঁ পোড়া মুই এ যুগর আদিচরণ।
----------------------------
২৬/০৭/২০১৬ ইং
ফটোঃ- প্রশান্ত ত্রিপুরা পোষ্ট থেকে। (ইন্টারনেট)

হন্যাঁ হাম্মো?

ছড়া,

হন্যাঁ হাম্মো?
---------

হন্যাঁ হাম্মো? সনার চিজি!
ইক্কুলোত্ যায় আঝি আঝি!
হন্যাঁ হাম্মো মত্তুন্ বেশ্?
য়েবেলা-ওবোলা বোইবো শেঝ্!
.
হন্যাঁ আলজি? বেলেইবুঅ।
উন্দুরে গত্তন্ হলঅ লবঅ!
উবোমূ গুরি ঘুম্ যায়।
ভাত্তুন্ হাদে সোদ্যে তোগায়!
------------------------
২৪/০৭/২০১৬ ইং

গীত্, ধাগত্ বসছি নাগুরি

ইক্কো গান্ ওক্.....
"ধাগত্ বসছি নাগুরি"
----------**-**--

বাজারত্ যাদে ছারা দোজ্,
হুজি হারু, ঠেঙত্ হারু,
য়্যেধঅ দাধ' বাঙুঁরী।
আনি দোঙঙেয়ো ও....
হুদু গেলে, যাদি আয়,
রিনি চাগি, পিনি চাঘি।
ধাগত্ বসছি নাগুরি।
------ঐ-------
.
বাঞ্যেঁ দগানত্তুন্  চিকছড়া,
চুলোত্ বেড়েবার ফুলছড়া।
হয়দিন থেবে বেজারে!
ন' থেচ্ আর ধুঝ্ ধুরি।
ধাগত্ বসছি নাগুরি।
------ ঐ---------
.
উনো ন' থোক্ নাক্কো তর,
ভারীও নয় আধআনা ভর।
চাহদে দোল্ পাং নাকফুলুন্,
যুনি অলে ধুঝুরী।
ধাগত্ বসছি নাগুরি।
-------ঐ--------
.
বাজার উনো রাগেনে,
দশচান্ দোগান্ ঘুরিনে।
আনি দিলুঙ্ রিনি চাগি,
নারিত্ তেল' চিজিরী ।
ধাগত্ বসছি নাগুরি।
------ঐ-----------
--++++++-----------
২২/০৭/২০১৬

বেবে বেনান্ উদোনত্

ছড়া

বেবে বেনান্ উদোনত্
------------------

টেঙাঁ - পয়জা বোনোই আধত্,
       রাঙাঁ - কালা দগানত্।
পোজ্জেন্ আঘে, টানাত্ নেই,
      বেবে বেনান্ উদোনত্।
.
ভাত্ - তোন্ মজা উব্ নেই,
      বোনোই যিয়েগোই বাজারত্।
বাজার' ফিয়ে টাঙেঁয়্যা রুয়ে,
      দোগোনো বাজ' ইজরত্।
.
বেন্ মুজুঙোঁত্ বেবে আঘে,
       বাজার' পধতান্ চেই।
বোনোই আধত্ সিদোলো পঙাঁ,
      এক নাল্ সুধোও নেই।
-------------------------
২১/০৭/২০১৬
ফটোঃ- CHT Jumma culture.

সনার চিজি ইক্কুলোত্ যেব'

ছড়া

চিজি ইক্কুলোত্ যেব'
-----------------

মাধাত্ গুলি তুমবাচ্ তেল্,
      পিদিত্ বুগি বেগ্।
সনার চিজি ইক্কুলোত্ যেব',
       মনান্ অয়ে এক্।
.
লুচ্ছেং বেলেইবো ঠেঙেঁ ঠেঙেঁ,
        ইক্কুলোত্ যেদ' চায়।
কান্ ওক্কোরবো হন্ পাক্ হিয়ে,
          ইও হবর ন' পায়।
.
দাধা আক্কল্ বেভে পিচ্ছে,
        মধ্যে সনার চিজি।
লুচ্ছেং বেলেইবো কানেল্লোই,
       চোখকুন্ পুঝি পুঝি!
------------------------
২০/০৭/২০১৬ ইং

ডিজিটাল বৈদ্যালি

ছড়া,

ডিজিটাল বৈদ্যালি
---------------

উন্দুরবো গল্ল' মোবাইল,
      বেলেইবো ধল্ল' ফোন্।
মুইদ' ইক্কে ঘরত্ নেই,
    এ্যদো শিরে মোন্।
.
ম' বুড়ির উয়ে মাধা পিড়ে,
       দিধে তেল্ পুড়ি।
আগা পাদাত্ জেততেল' নাদাত্,
      ফোনান্ থাক্ ধুরি।
.
অসুগে অসুগে বাজার বন্,
      নেই হোনো তেল্।
ডালি, বাহঝা দেধে দেধে,
     গদা জিংহানিয়ান্ গেল্।
.
মাধা উজু ফোনান্ ধুরি থাক্,
      মন্দর জুবি চাং।
গম্ ওই গেল্ মাধা পিড়ে,
     তুই থাক্ মুই যাং।
-----------------------
১৮/০৭/২০১৬ ইং

তরে বলাঙঁর

তরে বলাঙঁর
----------

কনঅ বজর ন' অলেও বেড়েচ্ছি তুই এ বজর।
পধতান্ দেঘে দোঙ শুনি থাক্.....
যিয়ত্ ছড়ান্ উয়ে দ্বি দজর।
দজরর ডেন্ ধাগত্ চামিনী গাজ্,
গাজ' ধাগেদি জুমো পধ্।
ডেনে-বাঙেঁ ন' আহ্লে যুনি তুই এজস্,
হামাক্কায় লুমিবেগি চ্যা ম' ঘরত্।
.
ঘোত্যা-ঘোড়া পধঅ মায়।
বিজোল্ ফিজোল্ পধ্,
নক্ কুবি কুবি য়্যেস্ চ্যা হামাক্কায়।
মাঠ্যা জুক্, চিন্যাহ্ জুক্কুন্ ন' ডোরেস্!
ফোঃ ফোঃ ছেপ্ দিনেই....
মুগুজো পাদালোই তুই ফেলেস্।
.
এক্ কাবঅ মাধাত্ জিরেচ্ছি।
গুলো গুলোও... কাদামলাহ্!
ভারীও অজল্ নয় চ্যা, আধতলাহ্।
সিত্তুন্ গুলোদক্ হে বল্ ভোরেচ্ছি।
.
সিত্তুন্ উদিবেগি দ্বি কাবত্।
বুজিবেগি পধঅ পাজারা জুম্ চাবত্।
পিজেদি ফিরি রিনি চেস্,
দেগিবে, গাজঅ ঝুবো ছেরে ছেরে,
রিপরিপ গুরি দেঘা যায় চ্যা...
ফেলে ইচ্ছসচ্ছি ঘরানি আদামত্।
.
তিন্ কাবঅ মাধাত্ চিবিদ্ গাজ্।
ছিলুমো গুত্তুন্ হুলিনে হাক্কন্ থে চেচ্ছে,
কেজান্ পাহছ্?
জুরো জুরো পিবির পিবির বুইয়ারানি,
হুত্তুন্ এজেরও চ্যা কিজেনি!
.
জিরে ফুরেলে লর দিবে।
মোন্-মুড়ো চে চে কদঅ কধা ভাবীবে।
হক্কে হক্কে মোনো পিদিত্ লুমোচ্ছি,
হবরও চ্যা তুই ন' পেবে।
.
মোনো পিদিত্ যেক্কে উদিবে।
ডেনে-বাঙেঁ হুয়োও গুরি,
সেঙেঁ কাজলঙঅ হুয়োঙুন্ দেঘিবে।
যেক্কে তরে ধুব্ ধুব্ ঢেবা পানিয়ানিয়ে ডাগিব।
হবর পেবে, সেক্কে তর....
উদিবজোচ্যা বিদিযিয়া কধানি,
হোচপানার পুরোন্ মেইঁঞানি,
পিড়ে-ব্যেধি ধক্ জাগিব্!
তুজো আগুনো ধক্ আঙিঁব্!
.
সেদক্কানি কধা ন' ভাবী।
দোগিন্ মুখ্যা সিজে বেহ্ ;
লাঙেঁলঅ পধ্ ধুরিচ্ছি।
পত্থম্ লাগত্ পেবে যে ঘরান্,
আমিজে লামেয়্যা থায়চ্যা সাঙুঁয়ান্ ;
পিজুম্ বাজ্ ধুরি চুবেচাবে তুই উদিচ্ছি।
--------------------------------
১৬/০৭/২০১৬ ইংরিজি।

যুনি ফেলে ন' যাস্ পরানি

ইক্কো হোচপানার কবিতে ওক্......

"যুনি ফেলে ন' যাস্ পরানি"
------+----+---------

হবর ন' পাং পরান্,
হুদু তর ঘরান্,
হেনে আগচ্ হিজেনি এ মাধান্।
অজার পিত্থীমির মোন্-মুড়োর
হোনো এক্ জাগাত্ পুড়ি।
ঘুম্ নেই মর দ্বিবে চোখ্,
নীজি রেত্ জাগঙ্,
তুই আগচ্ ম' লগে....
স্ববনে পত্থমে দেঘঙ্।
আ হদ' হধা ভাবং...
অজার পিত্থীমি ফেলে,
হেনে রলে মর চিগোন্ মনান্ জুড়ি।
.
হোচ্ছেবারও ছের নেই,
জুড়ি আগচ্ পুড়িনেই।
হুদু থোম্ মর বারেং, ডিঙিঁরা,
লুদুঙ্, সাম্মো, জিংহানির সজপদর।
সিধেনদি টাঙ্যাঁ ফিয়াবো,
সিয়ত্ ঘুর হারি মরের
আওজোর দুলু বাজর বাজিঁবো।
সাজিত্ ভিজিযার ফুলবারেং,
নায়ানাক্যা মর এই গারেঙ্।
পরানি, গায় গায় তুই ন' আদর।
.
চেরোপালা ইক্কে ফুদোদন্ ফুল্,
নানান্ পেক্ এত্তন্,
গাজে গাজে বাহ্ গত্তন্।
দিন্নো এলে ন' ফুরোয় তারার নাগরানি।
সাজি উদের ইক্কে মনর জুম্,
সজে উদের খেত্ খেত্তি।
দোগিনোর শিজেবোত্ বানিম্মোই ঘর।
সুমুরিম্মোই জিংহানির সজপদর।
যুনি তুই ফেলে ন' যাস্ পরানি!!!
-------------------------
১৩/০৭/২০১৬

"চেজেক্ বুবুক্"

আরো ইক্কো বারিজে ছড়া,

"চেজেক্ বুবুক্"
-----------

চেজেক্ চেজেক্ ভাত্ পিলে,
      তেদের তেদের দেবা ঝড়।
দ্বিবে গরুলোই ধেদেক্ ধেদেক্,
     বামত্ বাঝে জুনোপহর্।
.
দারবো অয়ে লেদা লেদা,
     পিবির পিবির বুইয়ারান্।
গরুউন্ ন' আধন্ সুজুর সুজুর,
     ঘরত্ রুয়ে জুমোরান্।
.
ভাত্তুন্ অলাক্ পেচ্ছাল্ পেচ্ছাল্,
     হুজুক্ হুজুক্ ঘোরবোউন্।
দুধ্ ন' হেলে ঘিলুকবলা,
     হেনে অবাক্ পোড়বোউন্।
.
গরু ছ'বো ছিয়ান্ ছিয়ান্,
     দুনুম্ দুনুম্ হন্যাঁ যার?
হিল্যে হিয়ো পিয়ক্ পিয়ক্,
     দুধতান্ উদুরেবো পেলাংবার!
-----------------------
১২/০৭/২০১৬

আঝার মাস্যা ছড়া

ছড়া ( আঝার মাজর শেজত্)

আঝার মাজ্
----------

দুরোদুরি মামু ঘর,
চিজি যেব' বজর পর।
উজুমহনে আঝার মাজ্,
ঠেঙেঁ ন' ছুয়োয় মাদি বাজ্।

এক জাগা হুচ্ এক জাগাত্ যায়,
হাক্কে হন্যাঁ আজার হায়.....
যাদে যাদে বেল্ দিবোর,
এক্কো আজারে তিন্ চিদোর!!!
*************************
০৯/০৭/২০১৬

এক গোদেল্ হোচপানা

এক গোদেল্ হোচপানা
********************

ন' জানঙ্ হোইবুলি,
দেঘে ন' পারঙ্ বুক্কো মিলি।
এগামনে বানাহ্ গরঙর তবনা!
হোই পাত্তুং হুলি হুলি,
দেঘে পাত্তুং বুক্কো মিলি,
এ বুক্কোত্ দেঘিদে এক গোদেল্ হোচপানা!
কারে হয় চিত্ পোড়া!
বুজিদে কারে হয় জঞ্জালুক্ ভাবনা!
.
হঙত্তে হধানি তুই ন' ধুরিস্।
যুনি আওচ্ থেলে,
এ মনর ফুল্ বারেংয়ো চেবার চেলে,
সিধেনদি ঝাপ্পান্ তুই তুলিস্।
দেঘিবে পরানি সেক্কে....
মনর আগাজত্ বার্গীপেক্কুন্ হেনে ভঙঁন্,
আ, তত্তে জমেয়্যে সাত্ দজ্যে হোচপানা,
পেলাংবার চ্য তুই জানিস্।
.
সে হোচপানান্ এচ্যে আধত্ তুলি,
হবাল' উজু সাত্ পাগে নিজিনিজি।
হৈ-চোল্ আ এক ছক্কা পানি দিই,
ত' মুজুঙোঁত্ গজাঙর।
আঝা আঘে গুজি লবে,
তর মনর বারেঙত্ সুমুরি থবে।
উনোনিয়্যা আঝা তইদু রাগাঙর!!!
******************************
০৮/০৭/২০১৬
ফটোঃ- শিল্পী সুপংকর দাঙ্গু।

জিংহানির লামা

জিংহানির লামা
-------------

চোঘোত্ ভাজীনে হি অব',
মনর চরততো বাহজের।
মাধানর গঙাঁরত্ আড়ে গেল্
ঈধোঘরর সাত্ দোজ্যে।
ন' ভাজের তর-মর,
বিদিযিয়া জিংহানির পুন্নিমা-আঙুঁচ্যে!
.
নিধুকতুক্ জিংহানি সপ্পানত্।
পেলাংবিয়া হোচপানা এল' আমিজে।
জিংহানি গঙাঁদে, পরানানি তরাদে,
ছহলচাদ্ গুরি হাদেয়েই দিন্ মাধান্।
সুখ্ বাদে দুঘ্
তর-মর গা'ত্ ন' বাহজে।
.
সুঘো সাদায় ঘেরেং বাঞ্যাঁ হিয়েনিত্,
লেম্বে ন' পারে দুঘোর আগুনে।
ডেমেলাক্ ডেমেলুক্, বিজোল্ ফিজোল্,
নিবিলির পত্থানি মোঞেঁয়েই আঙুঁচ্যেত্,
উচ্ছো ফুচ্ছোই আধে আধ্ ধুরিনে।
.
গেলাকও বিদি ভালক্ বজর।
মকতবা উয়ে ঈধোঘর।
চোঘোত্ ভাজিলে সুঞ্জুক্ ফুদে মনানত্।
রিপরিপ পিজেদি মেলে যাদন্ সে দিনুন্,
ন' এবাক্ আর ডাগিলে।
.
এক্কা এক্কা চোঘোত্ ভাজী হি অব'
শুঘে যিয়ে মনর দোজ্যে,
হেনে ফিরি এবাক্ সে দিনুন্,
এত্তে ছহলাত্ মনর চরত্ বাহজিলে!
******************************
০৫/০৭/২০১৬

জেদেনা হৈ

( জেদেনা হৈ)
------------

বেগুন্ - মুরিচ্ জুম জগাহ্।
কিয়য় যেইয়ে নেই তোন্ তোগা।
চেজেক্ বুবুক্ পদ্ - ঘাদ্।
পা'ত্ ন' উদের তোনপাত্।
.
আজার মাস্যা দেবা দর।
হদক্ থে পারে বান্ধা ঘর।
দেবা দরত্ জেদেনা হৈ।
হাদে গম লাগে চানাত্ বৈ।
---------------------
০৪/০৭/২০১৬ ইংরেজি।

কু'রিত্!!!

কু'রিত্!!!
------

বারিজে দেবাত্ নেই কালামেঘ,
আহল্যার চাজত্ ন' উদের রুয়োপেক্।
কু'রিত্! কু'বহ্! হেলের পিত্থীমিত্!
ওলোমোস্তো, জঞ্জালুক্ সপ্পানিত্।
বোদোলের দেবংশি সুধোম্!
লুড়ি যার আব-হাবাহ্, এ্যেন্-হারন্!
পুদি পুদি বেক্!
.
হরাণে আঙিঁ যায় শীতভুই।
পেদেপেদে দ্বি-এক্ শিজে লুঙিঁলে,
আগাম্ বারিজেয় ভাজে নেজাই পিত্থীমি।
ভুইবলার স্ববনানি ভাজী যায় গঙাঁরত্!
দাহবর হে এলুনি হেলুনি,
উদের-ডুবের!
আবারাল্লোই "চিলাকধাগ'" ধক্,
শিল্ চাদারাত্ হন্ পাত্তরত্, হন্ পাড়ত্!
.
চিগোন্ চিগোন্ কিয়েনি,
গাবুর পাঘি যার মনানি।
দেজ-মুলুক্ থাহর নেই,
হাক্কঞ্যাঁ ওচ্ পুরাদন্।
দাম নেই দাম নেই আগ' ধক্.....
ননন্-ভোজ, শুড়ি-বো'র আলুলো দুলুলো।
রাধামন-ধনপুদি, নিলকধন্-নিলপুদির,
হোচপানার মেইঞাঁনি!
চেরোপালা কু'রিত্, কু'বহ্,
ভাজী যার সংসার।
হি ওল্ হি ওল্ হিজেনি!!!
------------------------
০২/০৭/২০১৬