ছড়া
বান্দরে ঝাড়দন্ ঘুচ্যে তায়া
--------------------**
বান্দরে ঝাড়দন্ ঘুচ্যে তায়া,
ঘুত্যে মাধাত্ বোই।
দাধাহ্ খেলেল্লোই ঘিলে খারা,
দিবের হবর নেই চৈ।
.
মামাহ্ কাদের চিগোন্ সুধো,
চোরগি কলান্দোই।
বেবে তুলের খাদিত্ ফুল্,
আলাম' ফুলুন্দোই।
.
বাবাহ্ গরের পেবের পেবের,
বেক্কুনে থবাহ্ থবাহ্!
বিঝু এজের, বাচ্ছে থাগ',
কনে কি লবাহ্!
---------------------
১৭/০৯/২০১৬ ইং। ফটোঃ- নিজ।
"বাবা মুই তরে নিনেই বার গরঙ্"
-------------------------
জিনঙ্ ন' জিনঙ্ ন' বুল্যা দ্বি আধে।
পহঁত্যা উদি সাঙুঁয়ান্ থং পাদে।
হক্কে এবে, হক্কে এবে গুরি।
আওচ্ছান্ চিমোর অয়,
আঝায়ান্ ন' ফুরয়।
পধ' হিত্তে চেই থাং,
তুই এবে ভিলি........
দুঅরর রিঝুম্মো আজাগুরি।
.
সাজ্ ঘনে এলে দেঘিম্ পারাপাং,
জলক্ ফলক্ গুরি ভেদাদিবেগি!
ডাগিবেগি মামারে....
চিজিমাবো! ও চিজিমাবো!
ধুরিচ্ছি দে ফিয়াবো.......
উচ্ছো ফুচ্ছোই মামাহ্ এব',
হুজিয়ে কারর মাত্ ন' ছুদিব'!
সাঙুঁ বেই উদিবাগি সমারে।
.
যাদে ছহলাত্ মরে হুইয়োচ্ কিরবে গুরি,
এবেগোই যাদি ফিরি।
শত্রুয়ুন্ উদেই দিবে লাড়ে গুরি!
হুদু আগস্ বাবা, এদক্ বজর ধুরি?
ইন্দি মামাহ্ থায় বিচ্ছোনত্ পুড়ি,
চেরাং চেরাং চোঘোপানি!
আমিজে মরে দেয় বুক্ বানি।
চে থাক্ চিক্কো, চে থাক্.....
"মায়" যুনি রাগায় সুখ্,
রাজা ভেজে ত'আবে এব' হবং বানি!
.
সং মোমি লাড়েয়ত্ এলে মুখপাত্তি!
ন' ডরেদে, দিধে বুক্ পাদি!
তরে নিনেই বার গরঙ্,
বুক্ অজল্ গুরি হোই পারঙ্,
বুগোপাদা দাধ', বাপ্ তুই মর।
দেজ্-জাত্ হোচ্ পেই ছাচ্ছোস্ ঘর!
এইচ্ছে মুই পিত্থীমির বেক্ হোচপানা, ভুক্তি...
বাবাহ্, ত' নাঙেঁ নিজী থোলুঙ্ দ্বি আধে।
ফিরি আয়, ফিরি আয় তুই এ জাদত্।
সেনত্যে সাজ্ গুঙিঁ গেলেও,
সাঙুঁয়ান্ থোই দিলুঙ্ পাদে।।।
-----------------------------
১৪/০৯/২০১৬ ইংরিজি।
...লাড়েয়ত্ যারা ঘরত্ ফিরি ন' পারন্ তারার উদিজে উতসরেলুঙ্! বিস্তারিত্ ন হোলুঙ্.....
★ দ্বি লাইনোর হোচপানা কবিতে...★
"হোচপানা কারে কয়"
-----------------
আগা নেই, গোড়া নেই,
শুরু আঘে, শেঝ্ নেই,
নেই নেই ভাবনার থুম্!
তারেই কবং হোচপানা,
সংজাগাত্ আঝার খানা,
যেক্কে ন' থেব' দ্বি চোগোত্ ঘুম্।
.
জুবি জুবি থুইয়া কধানি,
ন'এয়ে ন'এয়ে মুয়েন্নি।
থোদে বোদে কিজু কনাহ্।
এক্ ভাক্ মান্,
বেশ্ ভাক্ অভিমান্।
তুওযুনি এক্ থানত্ মিলি পাল্লে।
তারেই কবং আজল্ হোচপানা!!!
...................................................
০৯/০৯/২০১৬ ইংরিজি।
ছড়া,
"আমা ভুজি ধহল্ করা"
------------------
আমা ভুজি ধহল্ করা!
পহঁত্যা যিয়ে চোল্ কারা।
ডবল্লা চোলোভাত্ ঝরা ঝরা,
চিজিক্কো তোগায় মুঠ্ জরা।
.
ডিঙিঁ কিলেত্ ভারভারি নেই,
সোর গুরিবেক্ কমলে!
এক্ ভুক্ দ্বি ভুক্ দি ন' পারে,
চোলুন্ পরন্দোই ওয়ালে!
------------------------
০৭/০৯/২০১৬ ইংরিজি।
ফটোঃ- Sonabi Chakma টেমলেনত্তুন্।
ছড়া
---
চিত্ পাগল্ ডাঙঁর ভুজি
-------------------
চিত্ পাগল্ ডাঙঁর ভুজি,
তোনোত্ ন'দে সাবারাং-ফুজিঁ।
হদক্ হে পারে ঘুজি ঘুজি।
বেগুন্ তোন্, আমিলা ঝুল্,
বাচ্ছুরি গদেয়্যে, ওলোদো ফুল্।
.
পুল্যাঙ' তলাত্ সুজমুরিচ্,
বের' মাধাত্ তেল্।
ভাত্-তোন্ পিলে উত্যেফুত্যে,
বিলেইবো ডিগেই গেল্।
------------------------
০৬/০৯/২০১৬ ইংরিজি।
"ওলি" (ঘুমপাড়ানি)
----------------
চিজি,
চিজিক্করে ঘুম্ নেযে নোযাই ঘরান্ কাজেস্,
... ভাতপিলেবু ওদোরেস্,
...তোন্ একপদ্ রানিস্,
আমি জুমোত্তুন্ এলেগোই গরম গরম্ তিদেশাক্ রাহনি হেবংগি। এদ্দুরোত্ হোইহাই মা-বাবে কামত্ যান্। মা-বাবর ডাঙঁরবো অলে বানাহ্ দুখ্!
চিজিক্করে এবার ঘুম্ নেজানা! দব্ছহবে ঘুম্ ন' যায়! ঘুম্ ন' নেজেলে কাম্ গুরি ন' পায়। ঢুলোনত্ পড়েল'।
.... বেবে মরে এক্কান্ হেত্যো হোই দে।
.... হেত্যো হোই দিলে ঘুম্ যেবেনি?
.... যেম্,
.... শুনিথাক্ বজোস্........
"ওলি"
------
এ....ত্তে....এ....এল' এক্ রা...জা....!
রাজার এলাক্ তিন্নো পুও।
তিন্নো পুওই রেজ্য চান্।
মাত্তর,
কিয়য় প্রজারে কোচ্ ন' পান্!
....বজোস্! ইঁ পড়া চিক্কো...
.... ইঁ!
সেনত্যে রাজাহত্তাহ্ ভাবীনে।
সনার চিক্কো তরে হোচ্ পেইনে।
তরে দিল' রাজ্য ভাগ্।
সনার চিজি চুক্কি থাক্।
....বজোস্!
.... ইঁ!
রাজার আগন্ য়্যেদ্-ঘড়া।
সোনা-রুবো দুল্ ভরা!
দুধোলী গরু ন' হরন্।
হে পারিবে চিক্কো, পেঠ্ ভরন্!
.... বজোস্!
.... ইঁ!
যুনি রাজায় গরে ভাগে ভাগ্।
রাজায় তিন্নো পুওয় ন' পেবাক্।
চেই থাক্, চিক্কো তুই চেই থাক্।
তরে হামাক্কায় দিব' ডাঙঁর ভাগ্।
সনার চিজি চুক্কি থাক্।
.... বজোস্!
... ইঁ!
রাজার ঘরত্ রাজার ঝি।
পরী মিলে সান্ গুরি।
আমিজে বেরেই থান্ লগে সমারী।
রাজার ঝিবো সেম্বা দোল্!
চিক্কো তুই দেলে, অবে ওল্!
.... বজোস্!
.... ইঁ!
কানিলে মুক্তো ঝড়ন্!
আঝিলে মানিক্ পড়ন্!
আধিলে হুজোত্ ফুল্ ফুদন্!
রাজার ঝিবো এব' পালকিত্ গুরি।
চিজিরে নেজেব' করত্ গুরি।
রাজায় তা ঝিবো বো দিব'।
সনার চিজি এবার ঘুম্ যেব'।
.... ঘুম্ এজের চিক্কো?
.... ইঁইঁ....... (ঘুম যার...)
------------------------
০৫/০৯/২০১৬ ইংরিজি।
ফুদোবো মুল মালিক্কো ইদু দায় স্বীয়ের গরঙর। মূলত ফটোবো চেনেই এই "ওলিবো"।
বিঝুরামর হবাল্
------------*
বেগে কহন্ বিঝুরামর কি চিদে ;
ভুত্ পারাহ্ পারাহ্ তিন্নো পুও,
গায় গদরে চেলামোষ!
এ্যদোশিরে মোজোরি খে পারিবাক্ নিঃচিদে।
.
মাত্তর,
জুমোত্ চেলে বিঝুরাম্ ;
ভুইয়োত্ গেলে বিঝুরাম্।
সাজেরুক্ সাজে ন' হরের আমিজে,
হেনে চেজাঙর দ্ব'ছহজ্যা গিরিত্তি।
মল্লে মরের বিঝুরামে,
কার' গাত্ ন' বাজে!
.
তাম্মা তুলে মনত্ দুখ্!
এক্কোসান্ মরে ঘজেআই.......
ও ত' পুওগুন্ কি অলাক্!
কেনে পারন্???
মরার পুও,
দুঘে দুঘে রাহনি দোঙগে ভাত্তুন্ ;
খেবার ছ'লাত্,
ঘেচ্যে, বাহভা বাহভিও ন' গরন্।
.
যা মুজুঙোঁত্ পড়ের তে খার ;
যিবে পিঠ পড়ের তে বাদাল্যা যার!
নেই মাদাবুলো, নেই ধরাধুজ্যে।
এম্বা এম্বা বুড়োবুড়ি বাজি থেনেই কি অব'?
মাদিবুলি ন' পাজ্যে!
শিরে হাং হাং, ঘুত্তে হাং হাং!
মনে অলে কয় গাঙহুলে যাং!
.
তারার চিগোন্ বোন্নোয়ো বো যেবার হরার ;
ইন্দি তারার দেই পারাপারি ন' ফুরার!
হন্যাঁ নিব' বো, কেরেঙ্গাল্ গিরিত্তিত্তুন্!
জানি-শুনি মুজুঙেঁ হন্যাঁ উজেবো।
হধে চাং, হুজিয়ে হন্যাঁ বো চাহর?
.
হবালান্ যুনি গম্ অলে,
পুওত্যে বো আনি,
ঝিবো বো দিই......
এদক্কন্ এক্ গোদেল্ নাদিন্ থেদাক্কি ;
কহরে কহরে, কাহনায় কাহনায়, আধে আধে।
ইন্দি অলে ও আজু!
উন্দি অলে ও নানু!
ধাগত্, পিদিত্, সপ্পানিত্ লেবেদে।
.
বুনি দিদুঙ্ হেরেঙজু ঢুলোন্ ;
বাজ্যাবারি হেদ' ঢুলোনে ঢুলোনে।
ইক্কোয় হধ' নানু টেঞেঁজাং ;
ইক্কোয় হধ' আজু ঝিক্কুকুক্!
হালিক্ ইক্কে,
বাগ' মাধাত্ চোখ্ ফেলে ফেলে এ এ...
বানাহ্ রাঙাঁ স্ববন্ দ্বি চোঘোত্।
চের আঙুল্যে হবালত্,
বিঝুরামর যে দুঘ্, সে দুঘ্!!!
--------------------------
০৪/০৮/২০১৬ ইংরিজি।
