আয় তুঙ্গোবী

আয় তুঙ্গোবী
-----------------

আয় তুঙ্গোবী আমাইদু,
      দলা খারা ওই।
মাট্যা ঘরত চানা জগা,
      মেত্তল মেত্তল বোই।

মামায়ো নেই বাবায়ো নেই,
     যিয়ন দুখকামত।
ঘর চুগিবো থে পাং মুই,
     বেল্যা মাধানত্।

আমা ঘরান ভাঙাঁচাঙাঁ,
     কম্বা কম্বা ছের।
কুগুরে খেলেগোই মিজেলানি,
    মাহত্তুন খেপেম মের।

চিক্কো পুদিরে লুক্কি পুদিরে,
       বেক্কুন ডাগি আন।
সাত ভেইয়্যা, একবোন সাজিবং,
       দুলোহুমোরী সান।

রুয়ো বাজত দুলোন টাঙেঁ,
       দুলিবং দুলোনত।
মৌঁইয়্যা হুদোত, কাট্টোল খারা,
      খেলিবং উদোনত।

তুই য়েস লূঃদি ধুরি,
      ঝনাত ঝনাত গুরি।
আমি থেবং মৌঁইয়্যা হুদোত,
     ভাতজরা বানদি ধুরি।

পাগানা কাট্টোল পাড়িস তুই,
      রাজার উগুমে।
আমি থেবং কাট্টোল ওইনে,
      কমরত ধুরিনে।

নুও বো, নুও জামে সাজিবং,
       বিগিদি বিগিদি।
তুই ওচ মর রাধামন,
      মুই ওম তর ধনপুদি।
_------------------------------
১৯.০৫.২০১৭

কামানি রুয়ে

বিছানায় শুয়ে বৃষ্টিস্নাত ভোরে লেখা, এখন দেখি ঝলমলে রোদ্দুর। তাই প্রেক্ষিত মিলবেনা...

কামানি রুয়ে
----------------------

কামানি রুয়ে ভেদের চেদের,
      দেবাবো ধুজ্জে দর।
ঘুমান অয়ে বিনি আধা,
      এক্কু লেজায় পহর।

লেদা লেদা ওলোন সাল,
      বানি মরা কেমানি।
দুরোদুরি মোনো পথ,
     বাঝি রুয়ে কামানি।

ঝাড়ত রুয়ে আগা পাদা,
      কিলোই ভাতমজা।
তেরতেচ্যা ঝড়ত আধা মাদি,
      কেনে ধান কুজা।

বৈজাখ জেতমাস ফুরেই যার,
      জুমান নঅ অয় কারন্দি।
আধা মাদি তাগলত বাঝি,
      ধানুন পড়ন্দোই বাড়েন্দি।
-------------------------------------
১৭.০৫.২০১৭

ঈদোঘর

ভালকদিন্ পর ইক্কো রোমান্টিক কবিতে........

"ঈদোঘর"
------------

    ক'বুয়া হুরিলে ঈদোত্ অয়।
চোঘোত্ ভাজে বৈজেখ্যে এদিনত্।
    ঘামে ভিজি বুরি যেই,
    কামে কামে নিজেস্ লবার ছের নেই।
তুও মিধে আঝি ন' হরে তর মুয়ানত্।
        ঈদোত্ আঘেনি তর?
        সে ধেবো, যে বজর....
তর-মর পত্থম্ দেঘা, দোগিন্ ধাক্যা জুমানত্?

    মোনো ওভোলা তমা ঘর ;
    এভেলাদি জুম হিয়োগি যে বজর।
ঠিক্ এ মাধান্, বৈজেখ্যে হরানত্।
       হন্ কামে ঈদোত্ নেই!
     একপাগে তমা জুমত্ যেই।
বানাহ্ তর মিধে আঝিবো,
            এব' ফুদি আঘে পরানত্।

    এ হধা, সে হধা, হদক্ হধা.....
    আঙিঁয়ে ভোঙিঁয়ে হধানি ফুরেই এলে.....
যুনি হং, হধে কারে হোচ্ পাহচ্?
     এয়োঁ নেই! চোয়োঁ নেই!
     চুচ্যাঙ্ তাগলান্ থুউরিত্ থগ্ দিনেই।
বানাহ্ আঝি আঝি চে থাহচ্।

     তর দ্বি চোঘোত্ থক্ চেদুং।
     তর মনর আমাদি ভাচচানি মাধেদুং।
থক্ও ন' পাং, উদ'ও ন' পাং।
    মাত্তর ইয়ান্ পাত্তুঙ্ হোই,
     মা পিত্থিমী বুগোত্ বোই।
আগত্তুন্ পিত্থিমীয়েন্ ভজান্, ভজান্ হোচপাং।

    অগ'লককো ডগরে তা আহলে।
    জুমবলায় ধান্ হুজোন্ তালে তালে।
হন্যাঁ হবর লর, ম' মনানে হি জবে?
     ঈদোত্ অয় তার-মর।
     দোগিন্ ধাক্যা জুমঘর।
     রংধঙর জুনোপহর্....
আহ, বেড়িয়েই হদক্ জুম চাবে চাবে!!!
-------------+-+--+-------------------
০২.০৫.২০১৭