আগ' দিনত্ আদামত্তুন্ চাগে জধায় রাজমোনোত্ জুম্ হান্দোই।
একধুজি জুম, ডাগিলে র' পা পি, গেলে ভালোদ্দুর। সুদিন মাধান্ এল'। তোগেলে
মাছ - হাঙাঁরা রাত্ নেই। সে পোইদানে ইক্কো গাবুজ্যে-গাবুরি র জুরপাল "ঠেঙাঁভাঙাঁ" গীত। (১) মিলে, (২) মরদ।
----(২) ও ও ঔ...........হিত্তে ডাগর চিক্কো?
১. যেবং নাহি ছড়াইজে, চিগোন্ ছড়ানত্।
বিঞ্যেঁ-বিল্যে বানাহ্ ভাত্ ন' যায় পরানত্।
.
২. হন্যাঁ হন্যাঁ যেবং চিক্কো হনে হি লবং?
ডুলোউন্ যুনি ঘরত্ থেলে, হুবোত্ মাছ্ থবং।
.
১. চিজিপুদিরে নয়য়ো হোধুং তুই যুনি গেলে।
ছড়াইজি হি অব' দাধো ভাগত্ ন' পেলে।
.
২.ভাত্ হে দে যেবং চিক্কো, দজরত্ বাচ্ছেচ্ছোই।
আগাব জাগা আগাব ছড়া, সেপপোদে লামিচ্ছোই।
.
১. হক্কে হক্কে এলে দাধো, ছার দ' ন' পেলুং।
আবাদাগুরি দেনেই যানে উগুরি উদিলুং।
.
২. এদক্ হেনে ইত্তুক পরান্, পাদারা তুই অলে।
গদা জীংহানি হেনে হাদেবে গম নেক্ ন' পেলে।
.
১. চের আঙুঁল্যে হবালানত্, হি আঞ্যোং হিজেনি।
এত্তে ইচ্ছং সিত্তুন্ আর মিলে জীংহানি।
.
২. এক্কান্ হধা হোধুং চিক্কো, হবার দিবেনি?
মামা দাগিরে পাধে দিদুং, উকিল ধুরিনি।
.
১. সোত্ ন' গুরিচ্ মুওন্ দাধো, বানাহ্ হধালোই।
হি গুরিবে আমন' ধক্যান্ হালা মিলেলোই।
.
২. নাহি চিক্কো জুজ্যে আগন্, ভাঙি হোই পারচ।
গুমোরো হধা ভাঙি ন' দিম্, শমক্ দিই পারচ।
.
১. মা -বাব' এগেম্ রাগে দিম্ দাধো, যিন্দি দিদাক্ শাদ্।
লেং, আদুর, ভুল্ বেদমা, অলে অয় নিজর জাত্।
.
২. শমক্ হাঙর রিনি চা চিক্কো ছড়াত্ লামিমে।
মাম্রা অদ' দেঘেদুং পরান্, বৃক্কো ফারিনে।
.
১. আগে দিনোত্ সত্য এল', ইক্কে দ' আর নেই।
হধায় হধায় লাং বদলান্, পুরোঞ্যোঁ ভুলিনেই।
.
২. ইক্কো পাল্লাত্ ন' মাবিস্ চিক্কো, অঞ্যঁ মাঞ্যোঁলোই।
হলাগাজর বেক্ পাদানি ন' জুয়োয় পাদা পোই।
.
১. দোলেদালে আগং দাধো, চিদেত্ ন' ফেলেচ্।
উজু সুরুং বেদমা মিলে, এক্কানা ন' ভোলেচ্।
.
২. মনে ন' গুরিচ্ গদা জীংহানিয়ান্ বানাহ্ তিন্ হুলো।
মা-বাব' ধগে গিরিত্তি গল্লোই অয়নি দিনমুলো।
--- গিরিত্তি অয়নি দিনমুলো।
.
১. বন্নাম্ ডরাং ও পরান্ দা, হনাহ্ হি গুরিম্।
মেইঞ্যাঁত্ বাজে ছাড়ি গেলে, নাকদি মুই মুরিম্।
.
২. চিদে ন' গুরিচ্ ও পরানান্, বৌচা এজঙর।
ডুলোত্ ভরাহ্ মাছ-হাঙাঁড়া, ঘরত্ দিবং লহর।
.
১+২. গঙ্গি সাক্ষী রাগে দ্বি আধ, এগত্তর গুরিলং।
জুম্ চাগালাত্ সুঘোর সংসার দ্বি জনে বানিবং।
--- ও পরান্ দা
--- ও পরান্ বে (সমারে)
দ্বিজনে বানিবং।
=================
কোন মন্তব্য নেই:
একটি মন্তব্য পোস্ট করুন