এ দুখ্, এ লাড়ে কাল্যায়

লেঘা-পড়া শিঘে ভিলি,
আজু-নানু, জ্ঞেদি-গুত্তি,
জাদর শিঙোঁর-পাঙোঁর..

যেবে ভুলি।
তোগেবে আগাব্ জাগা;
ঘুরিবে দেজ্-বিদেজ্,
বানাহ্ নিজর সুখ্-শান্দিল্যায়।
লাদি মুগোর, ভুগ্ খে,
কিয়ে মুরির ঝাড়ে জঙলে!
কধে চাঙ;
এ দুখ্, এ লাড়ে কাল্যায়!!!

কি নাঙেঁ জাত্ হলর;
কধা-বাত্যায়, ধগে-পাজনে,
যে ধগে চলর।
অন্যঁ জাদে কী ভাবীবাক্;
হচ্চর কবাক্ নেনা,
লচ্চর কবাক্!!
তুইদ’ সবাই ন’ লাজর!!!
এন্ যেন্ তর ধক্;
নিজরে সাহাব্ ভাবর।
কী সুখ্ তর মা-বাবর।
ন’ চাঙ্ এন্ লেঘা-পড়া;
যুনি কামত্ ন’ লাগে,
এই দেজ্-জাদর!!!

চোখ্ হাদি রিনি চা পিজে ফিরি;
তর লো’বলা কুদুম্,
কত্তমান্ দুগোত্ পুরি,
দুঘরে দুখ্ না, সুঘরে সুখ্ না…
সয়ে যাদন্ জাদল্যাই!!!
ভাবী চেস্ মুরোত্ পুরি;
তুই কন্ জাত্।।
এ দুখ্ কাল্যায়???
তুই মরর বানাহ্….
তর সুখ্-শান্দিল্যায়!?!

জুম্ম অইনে যুনি;
নিজর উড়োন্-পিনোন্ ন’ চিনচ্।
পরাহবাল্যা এ জাদর;
নাঙ্ ন’ ঘিনচ্।
বিঝু দিঞ্যাঁ পাজন্ ঈধোত্ ন’ তুলি;
কলা, মুড়ি গুলি খেই,
যুনি ইফতার হচ্।।।
ভাবী চেস্ তর নুয়ো তম্বা;
কন জাত্ হোলেবাক।
যেক্কে তুই নইয়ো থেবে,
তারা, আঝিবাক্ নেনা কানিবাক্!!!

যা আগে জাদর….
নিধুকতুক্ রীদি-সুদোম্,
এ’নি যুনি আঝীযায়।
আঝি আঝি, কানি কানি,
জগার পারি পারি,
চেরান্-পাচ্চান্ মূ লোই আ গুরি…
হোলেচচোই দোল্ জাত্।
আ গুরি বাচ্চে থাক্;
শুনিবাক্ সংসার’মায়!!!
"ছিলুম্ উচ্যে বান্দর ধক্”
…….. অবে চ্যা!
ভাবী চেস্…
পর’ ভাজে, পর’ ধগে,
তরে মানায় নে ন’ মানায়।
ন’ মুরিজ্ উচ্চোফুচ্চোই;
হাক্কঞ্যাঁ ওজোল্যায়!!!
এ দুখ্, এ লাড়ে কাল্যায়???