"আহরে যের্ নিজর্ ভাচছানি”

হুদু গেলাক্ গেঙখুলি,
উবাগীত্ আর্ হেঙগ্রং।
হুদু গেলাক্ শিঙাঁ বানা,
পুরোনা রঙ্-ধঙ্।

ধুদুগ’র’ তালে তালে,
পাগানা ধানর্ পেক্ ধাবানা।
বাজিঁ র’ তালে তালে,
হুদু গেল’ উবাগীত্ গানা।

শিক্ষায় শিক্ষিত’ ইক্কি,
ভুলি যের্ নিজর্ জাদ্।
ভুলি যের নিজর্ ধক্,
ভুলি যের্ নিজর্ মাহত্।

ইংরেজী বাংলা যে–
ঘরে-দোরে বেবহার্ গরে।
মানী-গুণী য়িজাবে
চিনিবাক্ তারে।

নিজর্ ভাচচানী যে ভুলি যের্,
ভাবী তারা লাজ্ ন’ পান্।
নিজর্ ধগে নিজে দোল্ ওই–
ইয়ানী তারা ন’ চান্।

হুদু ফেলে ইচ্চেই, বার’ মাস্যা আ
গোজেন’ লামার্ গান্।
যা হিজু আগে হনা ছেড়ে,
হিয়েই শুনিবের ন’ চান্।

চিগোনত্তুন্ ধুরি শুনি ইচ্চেই,
হিন্দি বাংলার ছায়াছুবি।
লাজে লাজে এ জাদর্ গানুন্,
মুড়োত্তুন্ মুড়োত্ যাদন্দোই ডুবি।

যা হিজু এল’ লাজে,
সিয়েনী ও মাজাত্ ভুদিবানি।
উইয়ে হেই যিয়ানি আগে,
উন্দুরে গত্তন্ টানাটানি।

আহরে যের্ এ দুক্যান গুরি,
নিজর্ বিজককানী।
নিজর্ ভাচছানি এক্ হোনাত্ —
এলাফেলা গুরি থোই,
পোল্ (প্রতিস্থাপন) দির্
অঞ্যঁ জাদত্তুন্ আনি।