তুই গেলে যা

মরে ন’ ডাগিছ্।
তুই গেলে যা,
ঐবো চা, কোচ্ পেব’ পা,
ঝাড়’ মায় ধুব্ ধুব্….

বুলোঙ্ ফুল্লো লুলোঙ্ গুরি।
এলুনি হেলুনি,
মরে যেন্ ডাগে,
তরে ডাগেনী???

কামা ভাঙাঁ মুড়োলেজাত্,
এক্ ঝাক্ সনার চিজিক্।
পুন্ ছেজর মারি,
আঝি হলক্ হলক্ ছাড়ি।
হাক্কে উজোনি হাক্কে লামনী,
খেলদন্ খারা।
তারা লগে লগে খারা অই অই,
মুই থেম্।
তুই গেলে যা,
সিধু গেলে ইয়ুন্ দেবেনি???

….. রোন না পেঁয়াজ?
….. পেঁয়াজ।
….. ধান্ না চোল্?
….. চোল্!!!
পানিত্ পোল্।।।
বানাহ্ জোল্ বানাহ্ জোল্।
বুক্ সঙয়্যা মোরোঙত্;
পহন্ পানির ছড়ানত্;
চিজিদাগী হদন্ খারা।
গাঙ’ পাড়ত্ আগঙ্ বোই।
ঈধোত্ উধের পুরনো কধানি।।।

মুই ইধু থেম্,
ন’ যেম্ ন’ যেম্।
সিধু গেলে ইয়ানী দেবেনি।।।

দোঙয়ো-চিক্কো দাগী,
বেগ্ বুগি বুগি।
নানাগান্ নাগর মাধি।
ঐবো মোন্-মুড়ো ভাঙীঁ।
ইক্কুলোত্ যাদন্ আধি।
হদক্ ঝড়ে ভিজদন্!
রোদে পুড়িযার গালানী!
তুই গেলে যা,
মরে ন’ ডাগিছ্।
কেনে ভুলি যেম্ মর এই….
কোচ্ পানানি!!!!

আদাম’ এধেদি গাঙ’ পাড়।
ধাগে পাদারে তারুম্ ঝাড়।
যিয়ান্ আমা চবাশাল্!
আমি যেন্ আদাম্ বানি আঘি,
সিধু আগন্ তর-মর আজু-পিজু দাগি।
যেবে কেনে ফেলে?
ন’ দেগিবে এই চবানী,
সিধু গেলে।
তুই গেলে যা….
মুই কাদেম্ ইধু মর জীংকানি।।।

চেরোপালা মোন্-মুড়ো, ছড়ানী।
দ্বি চোগে দেঘর যে জাগানি।
তর-মর আগ’ দিনর,
বুড়ো-বুড়িয়ে কাদে যিয়ন্,
সুখ্-দুগোর্ জীংকানি!!!

সে এই জাগা মাদি,
ভরদি উধি।
এম্বা অলে!!!
সে জাগা মাদি ফেলে গেলে,
কন্ জাগায় তরে জাগা দিব’,
মরে তুই হবেনী???

এই জাগা মাদিলোই লাড়ে গুরি!
সনা ধান্ ঘরত্ তুলি।
খাবে তুলি তরে-মরে।
দ্বি আঙুঁল্যা পিঠতান্,
গুরি দিলাক্ পাঁচ আঙুল্ গুরি।
তুই যে পারছ্ ভুলি,
গেলেও যা….
এ জাগা মাদি ছাড়ি!
মরে ন’ ডাগিছ্,
মুই মুরিম্!
এ জাগা মাদি আজাগুরি!!!