"চিত্ পুড়িবার হিচ্ছু নেই"
-------------------------------
হোবাল্ ন' পুড়োক্ ; তর হোচপানা!
ফেলেনেই বড় বড় এ্যরাহ্ দমা!
মাধা উজু সিলিং ফ্যান্,
এ্যয়ার কন্ডিশন রুম।
হরানত্ ঠাণ্ডা, জারাল্যা উম্ উম্!
ইদু এলে তর এক্ লেজা ন' অব' ঘুম্।
ও ভেই, ন' মুরিচ্ছি স্বর্গপুরী ছাড়িনেই!
হোচ্ পেবারও হি আঘে,
রেনি চেলে দেঘে।
উজু উজু মানেয়রে,
চিত্ পুড়িবার হিচ্ছু নেই!!!
মোনোমুঞ্জি ভাঙাঁ ঘর।
সুঘো দেঘা নেই জনমভর।
জিংহানিত্ ন' হান্ তারা আভিলেস্।
গালি ন' জানন্ লুচ্ছো।
যা ধগে তে, যা জাগাত্ তে,
আগন্ তারা পুড়িনেই!
হি অব' চিতপুড়ি।
থাক্ চুবেচাবে জুচগুরি।
হি দরকার?
উজু উজু মানেয়রে,
চিত্ পুড়িবার হিচ্ছু নেই!!!
যেই যেই হুইয়োন্ সংসারত্।
ভুঙীঁ পুজ্জোনদি আন্ধারত্।
অহদত্ বেক্কানি ইচ্ছন্ ফেলেই।
বিদ্যে-বুদ্ধি, লেঘা-পড়া।
পাগ্-চক্কর, ঘঙঁদা-হঙঁদা।
ইচ্ছনদে চুধো আধি,
বানাহ্ গোজেনর নাঙাঁন্ লোনেই।
ম'লে মত্তোক্ বাজিলে বাজতোক্।
হি অয়ে ; তর হোবাল্ ন' পুড়োক্!
চোখ্ হাদি থাক্.......
চিত্ পুড়িবার হিচ্ছু নেই।
ঘুচ্যে-সুধো যা কামাদন্।
অজেঅজ্ তার দাম্ ন' পাধন্।
মোন্-মুড়ো ভাঙীঁ,
দুঘে বুগি আনি
বেজিবার মাধানত্ থগা হাদন্।
সিয়ে-চেরআনা যা পাধন্,
তেল্-নুন্ কিনি, গঙাঁদন্ জিংহানি
দ্বি আধ্ সিধেন্ দি নিঃচিদে গুরিনেই।
হি অব' তারারে হোচপেইনে।
তর দোল্ ঘর গিরিত্তি থোইনে।
উজু উজু মানেয়রে,
চিত্ পুড়িবার হিচ্ছু নেই!!!
তুই বাজিনে যুনি জাত্ বাজে।
ন' থাদোক্ না জ্ঞেদি-গুত্তি আদে হাঝে।
তুই বাজিলে অয়।
হি দরকার তারার বাজিবার?
উদোদোক্ বুরুজ্। লুগোদোক্ চারঘার!
নেইদি আর কারবার।
গরজ্ ন' পড়োক্ মানবতা দেঘেনেই।
দরকার নেই, দরকার নেই।
সুঘোর গিরিত্তি ছারিনেই।
উজু উজু মানেয়রে,
চিত্ পুড়িবার হিচ্ছু নেই!!!
--------------------------------------
09.03.2017
কোন মন্তব্য নেই:
একটি মন্তব্য পোস্ট করুন