জুম্মবী ডায়েরীত্তুন্ দ্বিবা ন' বুল্যা হোবিদে

{ এক }

ঝুঁয়ুঁত্ ঝুঁয়ুঁত্ ঝলগা বুইয়ার!
পেজার' হপ্ উল্লে নেজার!

ঝিমিত্ ঝিমিত্ দেবা ঝিমিলানি!
গুরুঙ্ গুরুঙ্ আগাজ' বাজ্!

সাঙুয়ান্ তুল্লে আগে হি নেই?
হেঙেরা হেমে তান্ ন' মানের!
হেদাক্ তুক্ উল্লে যাদন্!
ফিবেক' বাজ্ হরত্-হারাত্!

বেক্ এমানুন্ আগন্ দলাবুদি আহমত্ তলে।
ভিরেভিচ্যে হায়-হুই, হাদাকহাদি!
পিঁয়ো পিঁয়ো শিককারি উদের --
গঙাঁর বুয়েরত্ পিজুম্ বাজ' মাধা।

রিপ্-রিপ্ শুনা যার ঝারবুয়া হুরার--
থেগে থেগে নিয়ালজি হদাকতাক্!
ঝক্ পুজ্জোন্ আলচ্যা পেজায়!
ডগত্তন্ পিজোর' হোনাত্ হোগিয়া গাজত্!
হন্যাঁ আগে?
যদে মেহলা দগোই আড়ালা রুবো!

ঘুর আয়ুঁচ্যা! বারিজার এ দিনোত্!
ছিনেছিঞ্যাঁ মোনোঘর, জুম্মবীর!
এলাফেলা, দিম্মাদান্ জীংকানির।।।

{ দুই }

হিয়ে অদা অদা, ঝাঁঙাঁত্ ঝাঁঙাঁত্ জার'হাদা!
জুম্মবী সুখ্ নেই শিজিয়ে পিয়ে।
শয্যবিজি, হাজিওলোদ, ঘিলেহোজোই --
হন্ ভুধিত্, হন্ মজাত্।

হবগত্ না চুমোপাবত্, নাহি--
ভাঙাঁ চাম্মোত্, উত্তোউজু, দমদমা তোগে চ'।
যাদি আন' জুম্মবী ছন্দভাচ্ মাদের!
পিনে দুয়ো, বাঞ্যাঁমোচ্যা আহধে-ঠেঙে।

সাজুন্যাঁ মায় গায় গায়,
তারে হন্যাঁ হুয়ে চিল'হনা মোরোঙত্ যেবাল্লায়।
হিনে হি র' শুনি! উগুরি উধি!
হানজাবা চুল্ জাগত্ গুরি!

গজাঙ্ গজাঙ্ লত্ দিই!
তাহরে তাহরে পিচ্ছে ফিরি ফিরি,
জলক্-ফলক্ হারে দেগি!
চিয়োম্যা চিয়োম্যা মনলোই ওজোলেঙত্,
গুজিমারি জুম্মবী আগে।
চোখ্ ফেলেফেলে হি হি দেগে!
ছন্দভাচ্ মাদে।

জুম্মবী ভাবে এক্ হধা,
মুইদ' ঠিক্ আগঙ্, শুন; মুই হি দেগঙ্ ----
চেরোপালা বাবে-পুদে, ভেইয়ে ভেইয়ে।
লড়ালুড়ি, মারামারি, গবাগুবি, ভারাভারি!

তোমার হি চিত্ নেই?
তোমার হি চোখ্ নেই?
তোমার হি হান্ নেই?
তোমার হি বিবেক্ নেই?
মরে উত্তোর দুয়ো!!!

মুই পাগল্ ওম্!
মুই আর শুনিবের ন' চাঙ্ হু হধা,
শুনিবের ন' চাঙ্ মরা হিজেক্!
তোমার রদ্-বল্ আগে।
সে বলানিলোই নিজর জাতভেই মার'!

মর হিচ্ছু নেই, মুই বরবাদ্ যাঙ্!
পাগল্ অঙ্!
চিদে ন' থোক্ আর মর মনত্।
জুম্মবী আজি (হারিয়ে) যোক্ এ এদেজত্তুন!
ঈল্ ফুদোক্ বেগত্তুন্।