গুজি গুজি কানি কানি,
চেরাঙ্ চেরাঙ্ চোগো পানিলোই...
চেরাঙ্ চেরাঙ্ চোগো পানিলোই...
জীংকানিয়ান্ ন' থেবে তুই।
এ চোখ্কুনলোই একদিন্ তুই,
ন্যেয় অন্যেয় বেহ্ লবে।
থিদির-থাদার আধানা ছলাত্ আজার খেই,
আদুঘিলে হিলুঙী আজুরী যেব'।
পারে পারেই হোই হোই;
আর' বেশ্ তরে...
আধানা উচ্চোমী তুলি দিবেক্।
আদুঘিলে হিলুঙী আজুরী যেব'।
পারে পারেই হোই হোই;
আর' বেশ্ তরে...
আধানা উচ্চোমী তুলি দিবেক্।
সেক্কে তেহ্ তর আধানা দর' অব'।
সে তর দর'-মর' আধানাত্ অন্যেয়েনী,
একদিন্ হুজুদি নেজেই পারিবে।
সে তর দর'-মর' আধানাত্ অন্যেয়েনী,
একদিন্ হুজুদি নেজেই পারিবে।
এক অহরক্ দ্বি অহরক্ তর ন' বুল্যা
মুয়োত্ মাত্ ছুদিব'।
ছাদারা-ঘাদারা হদক্ ভাচ্ তরে শিঘেবাক্।
পারঙ্ ন' পারঙ্ মাদি বুলি ভেঙেঁবে।
ঘুজিঘুজি তত্তুন্ আর পুজোর লবাক্।
ছাদারা-ঘাদারা হদক্ ভাচ্ তরে শিঘেবাক্।
পারঙ্ ন' পারঙ্ মাদি বুলি ভেঙেঁবে।
ঘুজিঘুজি তত্তুন্ আর পুজোর লবাক্।
এবার আধানা-মাদানা দর' অবে তুই,
আধানায়-মাদানায় যারা তরে উচ্চোমী তুলি দোন্,
তারা যেক্কে ন' থেবাক্ থেলেও
লুঙোর বুড়ো অবাক্।
গদা পিত্থীমির হাম্ করচ্ তর মাধাত্....
আবর হেই এব'।
এবার তুই স্বাধীন।
আধানায়-মাদানায় যারা তরে উচ্চোমী তুলি দোন্,
তারা যেক্কে ন' থেবাক্ থেলেও
লুঙোর বুড়ো অবাক্।
গদা পিত্থীমির হাম্ করচ্ তর মাধাত্....
আবর হেই এব'।
এবার তুই স্বাধীন।
তর হুচ্ পরোক্ গম জাগাত্।
তর চোখ্ পড়োক্ দোল্ কামত্।
তর কান্ ওক্ সজাগী,
তর মুয়ান্ ওক্ অন্যেয়র প্রতিবাদী।
তর চোখ্ পড়োক্ দোল্ কামত্।
তর কান্ ওক্ সজাগী,
তর মুয়ান্ ওক্ অন্যেয়র প্রতিবাদী।
গমেদালে রিনি চেলে দেগিবে.....
সিধেসিধি মানজ্যর আরভাঙাঁ চারভাঙাঁ,
দুঘর ভিক্;
কোদোগি মাঞ্যেঁ হিঙোরী ভারেই হান্।
ঊগুদো গুরি.......
তোমার নীতি, হবাল্ হারাপ্ হোই হোই
নিজর হবালরে বাইনী গুরি...
বিল্ডিং ঘরত্তুন্ বাবুয়ানা হোলান্।
সিধেসিধি মানজ্যর আরভাঙাঁ চারভাঙাঁ,
দুঘর ভিক্;
কোদোগি মাঞ্যেঁ হিঙোরী ভারেই হান্।
ঊগুদো গুরি.......
তোমার নীতি, হবাল্ হারাপ্ হোই হোই
নিজর হবালরে বাইনী গুরি...
বিল্ডিং ঘরত্তুন্ বাবুয়ানা হোলান্।
দেগিবে আর' রাধারাত্যে হুরো ধক্,
দ্বিবা হেই পেলে লুর বদলানা।
জাদর দুর্দিনোত্ গম্ হাম' নাঙেঁ ফগির অই,
মুরে মুরে দেজ্ জাদ্ বিজি হানা।
দ্বিবা হেই পেলে লুর বদলানা।
জাদর দুর্দিনোত্ গম্ হাম' নাঙেঁ ফগির অই,
মুরে মুরে দেজ্ জাদ্ বিজি হানা।
দেগিবে দোলানরে লরাদে লরাদে,
গাঙ্ পার অই বেজাদর রুক্কানরে দোল্ দেগি,
রাঙুচ্যা চোখচোমা লাগে রিনি চেই চেই..
বেজাদে মিজি যাদে।
গাঙ্ পার অই বেজাদর রুক্কানরে দোল্ দেগি,
রাঙুচ্যা চোখচোমা লাগে রিনি চেই চেই..
বেজাদে মিজি যাদে।
জিদেজিত্যা যুগোত্, জিদ' নাঙে
জিদ্ রাগেই,
ধক্ নেইয়া জিদ্ রাগাদে দেগিবে।
নুদি চিজিক্-চাজাক্ র' মেলি বাবুয়ানা হোলাদে।
শুনিবে রঙ-চঙর হধা,
ভালেদী পোইদার...
উগুরেদি নিজরে ভাবদন্।
ধক্ নেইয়া ফেজানী,
নুয়া যারা এত্তন্....
রেদে-দিনে মন্ আওজে তারারেও শেঘাদন্।
ধক্ নেইয়া জিদ্ রাগাদে দেগিবে।
নুদি চিজিক্-চাজাক্ র' মেলি বাবুয়ানা হোলাদে।
শুনিবে রঙ-চঙর হধা,
ভালেদী পোইদার...
উগুরেদি নিজরে ভাবদন্।
ধক্ নেইয়া ফেজানী,
নুয়া যারা এত্তন্....
রেদে-দিনে মন্ আওজে তারারেও শেঘাদন্।
দুরত্তুন্ তরে সেক্কে ঈচ্ গোরিবেক্!
অলে লাজেবে তুই,
......লাজেলে থুগিবে।
উধিজ্ গোরি ল' বিজগ্ ঘাদি ল'।
তর হুচ্ন' ন' পোরোক্ অপধে।
চিয়োম্যা মনত্ সাহস্ বানি ল'।
জগার তুল্! দেনে-বাঙে রিনি চেই!
ভেই-বোনুন্ ডাগি ল',
ভাঙী হ' গুমোরত্ ন' রাগেচ্।
অলে লাজেবে তুই,
......লাজেলে থুগিবে।
উধিজ্ গোরি ল' বিজগ্ ঘাদি ল'।
তর হুচ্ন' ন' পোরোক্ অপধে।
চিয়োম্যা মনত্ সাহস্ বানি ল'।
জগার তুল্! দেনে-বাঙে রিনি চেই!
ভেই-বোনুন্ ডাগি ল',
ভাঙী হ' গুমোরত্ ন' রাগেচ্।
হোনাহুনি ঘোনাঘুনি আদাম ছাড়ি,
শহর বন্দরত্ ছিদি দেহ্।
যিধু আগন্ তর লো বলা হুদুম্।
সমাজ্যা সমারী।
ফিরি এত্তোক্ জাদর বুগোত্।
মনানিত্ বানি সুদিন্ মাধানর,
হোচ্ পাহ্ পি আলুলো দুলুলো।
শহর বন্দরত্ ছিদি দেহ্।
যিধু আগন্ তর লো বলা হুদুম্।
সমাজ্যা সমারী।
ফিরি এত্তোক্ জাদর বুগোত্।
মনানিত্ বানি সুদিন্ মাধানর,
হোচ্ পাহ্ পি আলুলো দুলুলো।
ন' থোক্ চম্পক্ নগর, তেহ্ হি অইয়ে?
নুয়োগুরি বানেই লোই স্বর্গরেজ্য;
তেহ্ নাহ্ ফিরি এব' "চলাআবে".....
তার নাদিন্ পুদিন্ লোই
জুনো পহরত্....
হিরিমিচ্যা হধানীলোই।।।
কোন মন্তব্য নেই:
একটি মন্তব্য পোস্ট করুন