গাবুর’ জীংকানি

আঙুল’ মাধায় মাধায় দ্বিবা খেলুঙ্,
আধত্তান্ পুনত্ পুঝি পুঝি লামিলুঙ্।
কী সুখ্ মর গাবুর’ জীংকানি।

লাঙোনীল্যায় মর যেত্তমান্ পরান্ কানে,
বুক্ ঢিবেঢিপ্যা অয় জাহনে।
ইন্দি মা-বাপ মুরিলেও ন’ এজে চোগো পানি।

ঘরত্ রুয়ে মর অভেদর কাম্,
মা-বাবে ছের ন’ পাদন্ ফেলেবার নিঝাজচান্।
ইন্দি মুই দচ্ বাবুয়ে এক্ বাবু।
মা-বাবর মুই এক্কেরে ননিয়ে পুয়া,
খারার রাজা খেলং জুয়া।
পরিয়া জিনিসচোই মুই কাবু।

দেজ্-জাদ্ নাঙেঁ মর বড় বড় কধা,
তালিমালি গল্লে খেই দ্যুঙ্ মাধা।
বড় নেতা মুই সুশীল্ সমাজর।
দেজ্-জাদ’ চিদে আমনে ন’ গুরিলে,
নিজর সমাজরে আমনে চিত্ ন’ পুরিলে,
কন্যাঁ কাজেব’ সমাজর আদঙ্-কাজর।

মর বচ্ ইক্কে এককুড়ি চের।
বাঘে খেবার নেই আজের।
আমন’ মাধাত্ সমাজর বেক্ কামানী।
আদামত্ কা ঝি পিদোলী অল’,
কন্ গাবুরী কাল্লোই কধা কল’,
এক্কা ঠাহর পেলে বানি আনি!

থুম’ আদামত্,”পাত্তোয়্যা” কলে বেগে চিনন্।
গম্ নাঙেঁ মরে কিয়য় নাঙঁ ন’ ঘিনন্।
যিয়ত্ জাজন্ সিয়ত্ খাং ভাত্।
মোক্ লনেই দুগোত্ পলে!
বাজিবার ছ’বাই উবোয় ন’ থেলে,
বিজি খেম্মোই দেজ্-জাদ্।।।